Sulmuesi serb, Luka Jovic ka kaluar dhe një herë tjetër në vëmendjen e trajnerit të Liverpool, Jurgen Klopp. Jovic është një dëshirë e vjetër e gjermanit, por duket se tani është momenti i duhur që “The Reds” të bëjnë një lëvizje konkrete për futbollistin.
Klopp parapëlqen Jovic për aftësitë në kontrollin e topit, si dhe lëvizjen e tij në hapësirat e ngushta. Një tjetër arsye mendohet të jetë mosha mesatare e Liverpool. Sipas të gjitha gjasave, trajneri gjerman është i vetëdijshëm se futbollistët e tij nuk janë lojtarët më të rinj në Premier League. Në përballjen me Manchester City, formacioni titullar i “The Reds” kishte një moshë mesatare prej 28.8 vjeç.
Duke parë dhe stilin mjaft dinamik të lojës që ekipi ka adaptuar gjatë viteve të fundit, nëse Liverpool dëshiron të jetë kompetitiv në arenën europiane, është domosdoshsmëri afrimi i lojtarëve të rinj.
Për Klopp, pozicioni i qendër-sulmuesit është i një rëndësie të veçantë, pasi opsionet janë të limituara në këtë repart. Roberto Firmino dhe Diogo Jota kanë profile të tjera në vijën sulmuese. Braziliani është një lojtar më kreativ dhe me liri për të lëvizur në zona të ndryshme të fushës, ndërsa portugezi është më i drejtpërdrejtë, gjithmonë kërkon diagonalet e shpejta, për të përfunduar aksionin brenda zonës.
Askush nga reparti ofensiv i Liverpool, nuk mund të luftojë ose të dominojë lojën ajrore për të bërë diferencën, kundër mbrojtësave qëndrorë të kundërshtarëve. Për këtë arsye, Jovic shihet si alternativa perfekte nga trajneri gjerman.
Për më shumë, raportimet bëjnë me dije se sulmuesi serb gjithashtu dëshiron të largohet nga Real Madrid. Hapësirat kanë qënë shumë të kufizuara për lojtarin në skuadrën e Carlo Ancelottit, dhe ai është në kërkim të një klubi ku mund të aktivizohet më shumë. Megjithëse tek Liverpool, Jovic përsëri do të duhet të luftojë për një vend titullar, ai i ka të gjitha aftësitë dhe potencialin, për t’u shndërruar në titullar në ekipin e Jurgen Klopp.