Sipas raportimeve të prestigjozes “Mirror”, Juventus është në “pole position” për të sjellë Paul Pogba në Torino gjatë meraktos së verës. “Zonja e Vjetër” është në garë me Real Madrid dhe Paris Saint-Germain për shërbimet e francezit, dhe duket se ky i fundit është i prirur të zgjedhë një rikthim të shumëpritur në Itali.
Pogba do të largohet me kosto zero nga Manchester United në fund të sezonit, dhe është në pritje të ofertave nga klubet rivale. Pikërisht këtu hyn në lojë Juventus, që ka konkretizuar më në fund interesin për mesfushorin. Juventinët janë gati t’i ofrojnë Pogba një pagë javore prej 160,000 paundësh, pra rreth 8 milionë paundë në sezon. Përveç kësaj, bonuset dhe disa tarifa të tjera shtesë janë gjithashtu të përfshira. Kjo e bën ofertën mjaft tërheqëse, pavarësisht se paga është më e ulët në krahasim me atë që francezi përfiton tek United.
Duke qënë se Paulo Dybala dhe Giorgio Chiellini pritet të largohen në verë, Pogba do të ketë mundësinë të marrë rolin e protagonistit tek Juventus, një dëshirë e heshtur kjo e lojtarit. Sipas mediave italiane, ky është plani dhe i drejtuesëve të klubit, të cilët duan të ndërtojnë një ekip rreth Paul Pogba dhe Dušan Vlahović.
Në të kaluarën, Pogba nuk e ka fshehur dëshirën për t’iu bashkuar Real Madrid. Por këta të fundit duket se nuk kanë momentalisht interes për të sjellë në Santiago Bernabeu mesfushorin. Shansi për të përfituar shërbimet e Pogba iu dha dhe kampionëve të Manchester City, por ishte vet futbollisti që refuzoi lëvizjen. Kampioni i botës nuk dëshiron të luajë për një tjetër klub në Premier League dhe është gati për një aventurë të re diku tjetër.
Nëse gjithçka shkon sipas planit dhe Real Madrid nuk bën një ofertë surprizë në minutat e fundit, Pogba do të veshë fanellën e Juventus sezonin e ardhshëm.
