E ardhmja e Memphis Depay te Barcelona është në dyshim. Ky është lajmi që ka publikuar prestigjozja “sport.es”, sipas të cilës hollandezi është tashmë i ndërgjegjshëm se roli i tij në skuadër nuk është më ai që ishte në fillim të sezonit. Trajneri Koeman ishte mbështetësi më i madh i Depay dhe largimi i tij nga stoli i Barcelonës ka ndikuar tek shanset e sulmuesit për t’u aktivizuar si titullar.
Në të njejtën kohë, afrimet e Ferran Torres, Adama dhe Aubameyang sipas të gjitha gjasave do ta lënë në stol Depay. Për këtë arsye ky i fundit po konsideron largimin nga Barcelona dhe destinacioni i tij i ardhshëm mund të jetë Italia. Milan, Inter dhe Juventus kanë shprehur interesin e tyre për lojtarin, i cili mund të gjejë më shumë hapësira në sulm në Serie A. E ardhmja e Depay pritet të vendoset në fund të sezonit, por në këto momente, çdo indikacion të shtyn drejt largimit të tij.
Një tjetër skenar që po qarkullon në media është dhe rikthimi i tij në Francë. Drejtuesit e Olympique de Lyon thuhet se u pëlqen ideja e rikthimit të Depay në skuadër. Por ky skenar ka pak gjasa të ndodhë. Hollandezi e sheh këtë lëvizje si një hap prapa në karrierën e tij, ndërsa në Itali shancet për trofe dhe futboll europian janë shumë më të larta.
Gjatë merkato së janarit Depay u përfol për një largim të mundshëm por asokohe Barcelonës i nevojiteshin opsione në sulm. Në të njejtën kohë, lojtari ndihej më i sigurtë për pozitat e tij me blaugranat. Burime pranë hollandezit kanë bërë me dije se ai do të provojë dhe një herë shansin e tij për t’i treguar trajnerit Xavi se meriton vendin e titullarit. Por nëse nuk merr një përgjigje pozitive nga spanjolli, Depay nuk i mbetet zgjidhje tjetër përveç largimit.
