Italianët e Juventus janë duke ndjekur me vëmendje situatën e Axel Witsel te Borussia Dortmund, dhe mund të bëjnë një ofertë zyrtare për belgun, në merkaton e janarit. 32 vjeçarit i skadon kontrata në fund të sezonit, dhe raportimet sportive bëjnë me dije se klubi gjerman nuk është ende i sigurtë, nëse duhet t’i ofrojë Witsel mundësinë e rinovimit.
Mesfushori me tipare sulmuese mbetet një nga lojtarët kyç të Dortmund. Witsel ka startuar si titullar në 8 nga 10 ndeshje që klubi i tij ka luajtur në Bundesliga këtë sezon. Pavarësisht kësaj, lojtari është gjithashtu një nga më të paguarit në skuadrën e tij. Largimi i Witsel do të sillte një lehtësim të madh përsa i përket financave të klubit.
Këtu hyn në lojë Juventus. “Zonja e Vjetër” dëshironte që të afronte Witsel që në merkaton e verës. Kjo gjë nuk ndodhi për shkak se Dortmund u përfshi nga një valë dëmtimesh në mesfushë, dhe Axel i nevojitej gjithnjë e më shumë klubit. Por problemi i vërtet është fakti se edhe tani, situata me dëmtimet nuk është përmirësuar në Signal Iduna Park. Emre Can dhe Mahmoud Dahoud janë ende të padisponueshëm për trajnerin Marco Rose.
Kjo do të thotë se transferimi i Witsel te Juventus ka pak shance të ndodhë, nëse Can dhe Mahmoud nuk rikuperohen në kohë. Por duhet marrë parasysh dhe ana tjetër e medaljes. Dortmund e di shumë mirë se merkatoja verore është shanci i fundit që klubi të përfitojë të ardhura nga kartoni i Axel Witsel. Në verë lojtari mund të largohet me kosto zero nga klubi, dhe kjo sigurisht që nuk u intereson gjermanëve.
Në Torino, Massimiliano Allegri nuk është i kënaqur me performancën e mesfushorëve të tij. Trajneri i Juventus kërkon me ngulm një lojtar që të plotësojë aftësitë e Locatelli, Rabiot dhe Arthur. Në sytë e teknikut, Witsel është futbollisti perfekt për këtë rol.
