E ardhmja e Presnel Kimpembe tek skuadra e PSG është në dyshim. Francezi është rritur në klubin parizien duke ngjitur shkallët e akademisë, por zërat për një largim të mundshëm në këtë merkato vere po bëhen gjithnjë e më të fortë.
Presidenti i klubit, Nasser Al-Khelaifi, ka bërë të ditur dëshirën e tij për të ruajtur një bërthamë pariziene lojtarësh tek PSG, por lëvizjet që kampionët e Francës kanë bërë në merkato, nuk përkojnë me fjalët e Al-Khelaifi. Sipas raportimeve, PSG është një nga palët e interesuara në shërbimet e Milan Skriniar të Inter. Francezët gjithashtu po mbajnë nën vëzhgim talentin e Sassuolo, Gianluca Scamacca, si dhe mesfushorin portugez Renato Sanches.
Duke u nisur nga kjo situatë, Kimpembe ka lënë të hapur mundësinë e largimit nga gjigandët francezë. Në një intervistë të fundit, mbrojtësi deklaroi:
“Të gjithë e dinë dashurinë time për PSG, ajo është e dyanshme. Po i afrohem një momenti deçiziv në karrierën time dhe kontrata e ardhshme do të jetë mjaft e rëndësishme. Po pres të takohem me drejtuesit sportivë për të diskutuar projektet e ardhshme të klubit. Mendoj se duhet t’i zhvillojmë bisedimet shpejt.”
Chelsea është një nga ekipet që ka qënë vazhdimisht i interesuar për kartonin e Kimpembe. Londinezët kanë hasur pengesa në të kaluarën, por tani duket momenti perfekt për të bërë një ofertë zyrtare për talentin e PSG. Ekipi i Thomas Tuchel ka nevojë për përforcime në mbrojtje, pas largimit të Antonio Rudiger dhe Andreas Christensen me kosto zero.
Atletico Madrid është një tjetër ekip që interesohet për Kimpembe. Mësohet se përfaqësuesit e lojtarit janë takuar me drejtues të klubit spanjoll. Gjithsesi, Chelsea është ende opsioni më i favorshëm dhe tërheqës për francezin. Në të kaluarën, kanë qënë Manchester United dhe Juventus që kanë dështuar në tentativat e tyre për të siguruar kartonin e Kimpembe.