Liverpool nuk ka ndërmend të heqë dorë nga Eduardo Camavinga. Ky është raportimi i fundit që vjen nga Spanja, teksa mediat bëjnë me dije se trajneri i “The Reds”, Jurgen Klopp, është duke pritur momentin e duhur për të hedhur një hap konkret për shërbimet e mesfushorit. Florentino Pérez ia doli të sigurojë i pari një nga lojtarët më me prespektivë në arenën europiane, pavarësisht se Liverpool e pati ndjekur Camavinga, që kur ai ishte një adoleshent.
Menjëherë pas debutimit me madrilenët, lojtari ishte në gjendje të shënonte golin e tij të parë dhe zhvilloi shumë paraqitje në javët e para të La Liga Santander. Por fatkeqësisht, gjërat nuk kanë vazhduar të ecin aq mirë për të dhe gjatë muajve të fundit mesfushori pothuajse nuk është aktivizuar fare. Konkurrenca në pozicionin e tij është shumë e madhe dhe trajneri Ancelotti ka zgjedhur sigurinë e ofruar nga Toni Kroos, Luka Modric dhe Casemiro. Edhe në rastin e një zëvëndësimi, italiani ka zgjedhur Fede Valverde në vend të Camavinga.
Kuptohet se 19 vjeçari është tejet i frustruar, pasi një lojtar në moshën e tij ka nevojë të aktivizohet për 90 minuta të plota çdo javë, për të fituar eksperiencë. Kjo gjë nuk mund t’i garantohet në Santiago Bernabéu, por nga ana tjetër, Jurgen Klopp është i gatshëm t’i ofrojë hapësira mesfushorit.
Tek Liverpool, Thiago Alcántara vuan vazhdimisht me dëmtimet, ndërsa talenti premtues Harvey Elliot vuajti një dëmtim të rëndë, dhe nuk dihet se kur mund të jetë përsëri i gatshëm. Gjithashtu, Georginio Wijnaldum u largua drejt PSG në verë. Kjo do të thotë se hapësirat për Camavinga janë të lira, duke marrë parasysh dhe faktin se dhe James Milner mund të heqë dorë nga futbolli në fund të sezonit.
Megjithatë, Real Madrid nuk do të pranojë oferta për francezin, të paktën në të ardhmen e afërt. Por kjo gjë nuk e shqetëson Klopp, i cili është i gatshëm të presë, duke marrë parasysh se lojtari nuk ndihet mirë me trajnerin Ancelotti.
