Përfaqësuesit e Darwin Nunez janë takuar me disa klube të Premier League, për të diskutuar mundësinë e një transferimi gjatë merkatos së verës. Liverpool, Manchester United dhe Newcastle kanë shprehur të gjitha interesin e tyre për lojtarin e Benfica. Ndërkohë interesimi i Tottenham është konfirmuar zyrtarisht pas një takimi mes 2 palëve.
Mbetet për t’u parë nëse ekipi i Antonio Conte do të bëjë një lëvizje zyrtare për 22 vjeçarin. Vet lojtari ka konfirmuar se do të ndërpresë marrëdhënien me agjentin e tij aktual, Edgardo Lasalvia. Kjo ka bërë që në skenë të dalë emri i Jorge Mendes, por sipas raportimeve të fundit, super-agjenti nuk do të përfshihet në transferimin e mundshëm të Nunez në Angli.
Por përveç klubeve të Premier League, interes për Nunez ka pasur dhe nga Spanja. Bëhet fjalë për gjigandët e Real Madrid, të cilët janë në kërkim të një sulmuesi, pas rinovimit të Kylian Mbappe me PSG. Megjithatë, Los Blancos ngelen skeptikë për të afruar një emër të madh si Nunez, duke qënë se presidenti Perez ende beson se Mbappe mund t’i bashkohet ekipit një ditë.
Kërkesa kryesore e lojtarit është të luajë në Champions League, dhe kjo mund të përjashtojë Manchester United dhe Arsenal nga lista e klubeve që kërkojnë kartonin e tij. Por kjo nuk mund të thuhet me siguri, sidomos për United, që është shtëpia e disa portugezëve të tjerë si: Cristiano Ronaldo, Bruno Fernandes dhe Diego Dalot. Shokët e kombëtares mund të bindin Nunez t’i bashkohet United, duke marrë parasysh dhe faktin se skuadra tashmë ka një trajner të ri, Erik ten Hag. Ky i fundit ka një vizion të qartë për objektivat e “Djajëve të Kuq”, por mbetet për t’u parë se sa bindës do të jetë hollandezi për të sjellë Nunez në Old Trafford. Sulmuesi i Benfica ka realizuar 34 gola këtë sezon në 41 ndeshje.
