Një lajm i bujshëm është bërë publik në orët e fundit nga gazetari sportiv italian Fabrizio Romano. Sipas këtij të fundit, Kylian Mbappe nuk do t’i bashkohet Real Madrid sezonin e ardhshëm, por do të qëndrojë për të paktën dhe 1 vit me kampionët e Francës, PSG.
Sulmuesi francez telefoni presidentin e Real Madrid, Florentino Pérez, për t’i komunikuar vendimin e tij. Mediat angleze bëjnë me dije se Mbappe do të firmosë një kontratë 3 vjeçare me parizienët. Vetëm pak orë më herët, mamaja e futbollistit deklaroi se të dyja ofertat, si ajo e Real Madrid, dhe ajo e PSG ishin shumë të ngjashme me njëra-tjetrën, dhe tashmë i takon Mbappe të bëjë zgjedhjen. Dhe duket se ky i fundit e ka marrë tashmë vendimin.
Sipas kontratës së re, futbollisti do të qëndrojë në Parc des Princes deri në vitin 2025. Ndërkohë negociatat mes lojtarit dhe klubit francez janë ende aktive për opsionin e një rinovimi të mundshëm për 1 ose 2 vite të tjera. PSG pritet të zyrtarizojë marrëveshjen në orët e ardhshme.
Javën e kaluar Mbappe tha se vendimi mbi të ardhmen e tij do të zyrtarizohej shumë shpejt, përpara grumbullimit të kombëtares franceze në qershor. Superstari i PSG tha:
“Do ta bëj të ditur vendimin tim shumë shpejt. Çdo gjë është mbyllur. Zgjedhja ime është gati përfundimtare.”
Futbollisti iu bashkua PSG nga skuadra e Monaco në vitin 2017 për shifrën e jashtëzakonshme prej 180 milionë eurosh. Që prej atij momenti, Mbappe ka konsoliduar statusin e tij si një nga yjet më të talentuar të futbollit botëror. Kampionët e Francës refuzuan disa oferta nga Real Madrid, e fundita në shifrën e 200 milionë eurove në merkaton e kaluar të verës. Lajmi për rinovimin e Mbappe është një shuplakë për ekipin e Carlo Ancelottit, i cili shpresonte se Kylian do të zbarkonte në Santiago Bernabeu sezonin e ardhshëm.