Manchester United, Arsenal dhe Chelsea, janë gati të përfshihen në një betejë financiare, për shërbimet e sulmuesit të Inter, Lautaro Martinez. Gjigandët e Premier League janë në kërkim të një numri 9 dhe Martinez duket alternativa perfekte, duke marrë parasysh dhe formën e tij të mirë së fundmi.
Argjentinasi ka shënuar 7 gola në 9 ndeshjet e fundit në të gjitha kompeticionet, duke kapur kështu shifrën e 15 golave gjithsej këtë sezon. Përfaqësuesit e lojtarit janë në dijeni të problemeve financiare të Inter, gjë që i shtyn akoma më shumë drejt një transferimi në Angli. Ndërkohë, përsa i përket interesimit nga Arsenal, Chelsea dhe United, Martinez është një objektiv më lehtësisht i arritshëm sesa Kane apo Osimhen.
United dhe Chelsea janë linkuar me bomberin e Napoli, por presidenti Aurelio De Laurentiis mendohet se kërkon mbi 100 milionë paundë për shërbimet e nigerianit, ndërkohë që publikisht ka deklaruar se ai nuk është në shitje. Harry Kane ndërkohë, gjithashtu ka pak gjasa të largohet nga Tottenham.
Martinez nga ana tjetër, vet Lautaro thuhet se ka dëshirë të luajë në Premier League, por destinacioni i preferuar i argjentinasit ende nuk dihet. Trajneri i Arsenal, Mikel Arteta, ka kohë që mban nën vëzhgim Martinez dhe mendohet se është një adhurues i lojtarit. Londinezët sipas të gjitha gjasave do të luajnë në Champions League sezonin e ardhshëm, dhe tekniku spanjoll kërkon të krijojë një skuadër solide, sidomos në repartin ofensiv, ku nevoja për rotacion lojtarësh është gjithmonë e pranishme, duke marrë parasysh axhendën e ngjeshur dhe tempin e lartë të futbollit anglez.
Chelsea ndërkohë ka investuar tej mase në merkato gjatë verës së kaluar dhe janarit, por në varësi të rezultateve të këtij sezoni, nuk përjashtohet që blutë e Londrës gjithashtu të hidhen në sulm për Martinez.