Liverpool kërkon të mposhtë Chelsea dhe spanjollët e Real Madrid, në garën për të përfituar shërbimet e mbrojtësit francez të Sevilla, Jules Kounde. Sipas El Nacional, Jurgen Klopp është gati të paguajë klauzolën prej 75 milionë paundësh për prishjen e kontratës së lojtarit, gjatë kësaj merkatoje.
23 vjeçari është ndjekur prej kohësh nga Real Madrid dhe Chelsea, ndërsa “admirimi” i Liverpool ka mbetur në distancë. Por tani duket se Kounde është shumë afër një kalimi në Anfield. Sipas mediave në Barcelonë, mbrojtësi ka pranuar ofertën e “The Reds”, por ende nuk ka asnjë zyrtarizim.
Arsyeja se përse Klopp është hedhur shpejt në veprim, është fakti se gjermani kishte frikë nga një skenar ku lojtari do të rrëmbehej nga një klub tjetër në verë.
Kounde ka treguar një formë të jashtëzakonshme me Sevillan këtë sezon. Paraqitjet mjaft të mira në mbrojtje të lojtarit janë dhe një nga arsyet se përse klubi mban momentalisht vendin e dytë të renditjen e përgjithshme të La Liga. Të besuarit e trajnerit Julen Lopetegui gjithashtu triumfuan në Europa League në vitin 2020, me Kounde në zemër të mbrojtjes së spanjollëve.
Përsa i përket këtij sezoni, ish-lojtari i Bordeaux është aktivizuar në 17 takime në kampionat, prej të cilave Sevilla ka mbajtur të paprekur portën në 9 prej tyre. Gjigandët spanjollë kanë pësuar vetëm 13 gola në 20 ndeshje.
Ndërkohë, megjithëse Jurgen Klopp kërkon Kounde, “The Reds” nuk “vuajnë” për qëndër-mbrojtës. Ibrahima Konate ishte afrimi më i ri në këtë pozicion, verën e kaluar, ndërsa Joel Matip, Joe Gomez dhe Virgil van Dick gjithashtu aktivizohen në të njejtin rol. Por duket se Klopp ka nxjerrë mësime nga situata e vështirë me dëmtimet sezonin e kaluar. Duke qënë se Liverpool garon në disa kompeticione, Klopp e di se rotacioni i lojtarëve është diçka e domosdoshme për ecurinë pozitive të skuadrës, dhe për këtë gjë duhen opsione.
