Në momentet që po flasim, nuk ka dyshim se Ronald Araujo është qendërmbrojtësi më në formë i Barcelonës. Cilësitë e lojtarit kanë rënë në sy gati në çdo ndeshje, pavarësisht paraqitjeve të dobëta të klubit spanjoll. Uruguaiani i ka të gjitha, ai është i fortë fizikisht, zotëron mirë topin dhe është një nga lojtarët që kontribuon më shumë në fushë. Por Araujo është gjithashtu një rrezik potencial për kundërshtarët në sulm, sidomos nga goditjet standarte.
Dhe sigurisht, performancat mbresëlënëse të mbrojtësit kanë tërhequr vëmendjen e shumë klubeve europiane, por ato më “big” janë Chelsea dhe Liverpool.
Barça bleu kartonin e lojtarit për vetëm 1.7 milionë euro, dhe tani kërkon që të zgjasë marrëveshjen me Araujo. Kontrata aktuale e mbrojtësit me klubin skadon në vitin 2023, por planet e katalanasve për një kontratë të re me futbollistin, mund të prishen nga ofertat që vijnë nga Anglia.
Negociatat kanë filluar mes klubit dhe lojtarit, dhe marrëdhëniet mes palëve janë të mira. Araujo është jashtëzakonisht mirënjohës ndaj Barçës, por ai nuk po përjashton mundësinë e nënshkrimit të një kontrate më të mirë në terma financiarë, diku tjetër.
Spanjollët ndërkohë janë në dijeni të interesimit nga Anglia. Liverpool dhe Chelsea janë gati për të ndërmarrë hapa konkretë verën e ardhshme, kur lojtari të kalojë në vitin e fundit të marrëveshjes së tij. Duket marrë parasysh nivelin ekonomik të klubeve, dihet qartë se anglezët mund t’i ofrojnë lojtarit, më shumë para se Barça.
Nuk ka dyshime që Araujo dëshiron të qëndrojë në Spanjë, por ai paguhet pothuajse 10 herë më pak se disa nga kolegët e tij në mbrojtje. Barça do të përpiqet ta bindë duke i dhënë një rol të rëndësishëm dhe më shumë përgjegjësi në fushë, por në Premier League, ekipet elitare paguajnë shumë para për mbrojtës të kalibrit të Araujo.
