Liverpool ka arritur një marrëveshje me sulmuesin e Benfica, Darwin Nunez, përsa i përket kërkesave personale të lojtarit. Para pak ditësh u bë publike nga mediat portugeze se “The Reds” ishin në bisedime me klubin portugez, në lidhje me kartonin e Nunez.
Benfica mësohet se kërkon rreth 80 milionë euro për shërbimet e lojtarit, plus 20 milionë euro në bonuse dhe fitime të mëtejshme. Klopp është një adhurues i madh i uruguaianit, dhe kjo është arsyeja se përse Liverpool ka avancuar në bisedime, dhe është i gatshëm të thyejë dhe rekordin personal financiar për transferimet e lojtarëve.
Një tjetër arsye se përse “The Reds” po tentojnë fort të nënshkruajnë sa më parë me Nunez është dhe interesimi i Manchester United për sulmuesin. Agjenti i lojtarit, Jorge Mendes, do të takohet me drejtuesit e “Djajëve të Kuq”, teksa këta të fundit po tentojnë t’i prishin planet Liverpool duke joshur Nunez drejt një transferimi në Old Trafford.
Nunez ka tërhequr vëmendjen e shumë klubeve këtë vit, pas një sezoni ku shënoi plot 34 gola me Benfica. Eksperti portugez i futbollit, Pedro Sepulveda, tha se Manchester United, por dhe Newcastle janë vënë në ndjekje të lojtarit. Gjithsesi, Liverpool mbetet favorit i fortë për të firmosur me Nunez. Kjo jo vetëm për shkak se ekipet kundërshtare nuk do të luajnë në Champions League sezonin e ardhshëm, por dhe për shkak të trajnerit Klopp. Gjermani është nga teknikët më të mirë në botë për menaxhimin e talenteve dhe resurseve brenda ekipit, dhe një bashkëpunim i Nunez me Jurgen mund të rezultojë mjaft i suksesshëm për vijimsinë e karrierës së lojtarit.
Arsenal gjithashtu ka shfaqur interes në një moment për lojtarin, por tani duket se “topçinjtë” kanë vendosur të ndjekin pista të tjera për të përforcuar sulmin e tyre.
