Bordi drejtues i Liverpool është duke punuar fort, për të planifikuar strategjinë që klubi do të ndjekë sezonin e ardhshëm futbollistik. Qëllimi i “The Reds” është të mbeten një nga ekipet më të mira në botë, dhe për të arritur këtë objektiv, duhen ndërmarrë hapat e duhur në merkato.
Sipas raportimeve më të fundit, një nga emrat që Liverpool dëshiron të nënshkruajë është Fabián Ruiz, i cili po përjeton një nga momentet më të mira te Napoli dhe po rritet si futbollist, gjithnjë e më shumë me kalimin e ndeshjeve. Spanjolli është një nga lojtarët kyç të ekipit të Luciano Spallettit, dhe është gati të bëjë hapin e madh në karrierën e tij, për t’iu bashkuar një ekipi fitues në Premier League.
Jurgen Klopp po kërkon përforcime në repartin e mesfushës, dhe lojtari i përshtatet asaj që trajneri gjerman po kërkon. Kjo pasi Ruiz është një mesfushor që ka aftësinë të avancojë përpara, dhe të jetë deçiziv, duke dhënë pasën e fundit tek lojtarët e frontit.
Anglezët po monitorojnë me vëmendje progresin e spanjollit, për të parë nëse ai është në gjendje të luajë në një ekip, që ka si objektiv të triumfojë në të gjitha kompeticionet. Ndërkohë Real Madrid dhe Barcelona gjithashtu kanë shfaqur interes tek shërbimet e lojtarit në muajt e fundit. Megjithatë, kërkesat financiare të Napolit kanë stepur disi gjigandët spanjollë. Italianët pritet të kërkojnë një shumë të lartë për kartonin e Ruiz, duke qënë se nuk duan të humbasin një nga futbollistët e tyre më të mirë.
Gjithsesi, edhe në qoftë se Liverpool bie dakord me Napolin për transferimin e lojtarit, zyrtarizimi pritet të ndodhë gjatë merkatos së verës. Kjo pasi Klopp nuk preferon të prishë ekuilibrat e ekipit të tij në mes të sezonit, duke sjellë në Anfield lojtarë të rinj, që pretendojnë vendin e titullarit në skuadër.
