Tashmë që merkatoja e janarit është vetëm 3 javë larg, trajneri i Liverpool, Jurgen Klopp, është hedhur në lëvizje për të identifikuar lojtarët potencialë, me qëllim përforcimin e ekipit të tij. “The Reds” fituan minimalisht përballë Aston Villa me rezultatin 1-0 ditën e shtunë, dhe tani janë vetëm 1 pikë larg kryesuesëve të Manchester City, në renditjen e Premier League. Por për të rivalizuar ekipin e Guardiolës, përforcimet janë të domosdoshme për Liverpool, një skuadër që zhvillon një lojë mjaft energjike dhe me presing të lartë ndaj kundërshtarit.
Duke marrë parasysh këtë, raportimet e Mirror në Angli bëjnë me dije se “The Reds” janë të gatshëm të paguajnë plot 68 milionë paundë, për anësorin brazilian të Real Madrid, Rodrygo Silva de Goes. Burime jo-zyrtare thonë se klubi anglez i ofroi 51 milionë paundë Real Madrid në verë, për kartonin e 20 vjeçarit, por spanjollët nuk e pranuan ofertën. Gjithsesi, duket se Liverpool nuk është dorëzuar ende.
Rodrygo ka zhvilluar 14 paraqitje këtë sezon në La Liga, dhe ka shënuar 1 gol. Ai u bë pjesë e Real Madrid në vitin 2019, kur klubi spanjoll pagoi 39.3 milionë paundë për të marrë shërbimet e tij nga brazilianët e Santos.
Ndërkohë Liverpool ka gati dhe skenarët rezervë nëse transferimi i Rodrygo në Anfield dështon. Klubi po ndjek me kujdes anësorin brazilian të Leeds, Raphinha. Lojtari ka pasur një rol kyç nën drejtimin e trajnerit Bielsa, që kur iu bashkua klubit nga skuadra franceze Rennes, në vitin 2020. Ndërkohë Luis Diaz i Porto është një tjetër alternativë që drejtuesit e Liverpool po e shqyrtojnë me vëmendje. 24 vjeçari ka impresionuar me formën e tij këtë sezon në kampionatin portugez, duke shënuar 10 gola në 13 paraqitje. Në të njejtën kohë, atributet e kolumbianit si futbollist i përshtaten mjaft mirë preferencave të Jurgen Klopp.
