Sipas burimeve të Football Insider, Liverpool ka vendosur në listën e objektivave të merkatos, yllin brazilian të Ajax, Antony. “The Reds” kanë kontaktuar përfaqësuesit e klubit hollandez për të arritur në një marrëveshje të mundshme. Kujtojmë se lojtari është një nga objektivat kryesorë të Manchester United, teksa trajneri i “Djajëve të Kuq”, Erik ten Hag, e njeh mjaft mirë sulmuesin.
Ajax e vlerëson në shifrën e 59 milionë paundëve kartonin e Antony, por mësohet se Liverpool ende nuk është i gatshëm të paguajë këtë shifër për brazilianin. Sidomos duke marrë parasysh faktin se Liverpool ka shpenzuar një shifër rekord për klubin, për afrimin e Darwin Nunez nga Benfica. E njejta gjë vlen dhe për United, që pavarësisht nevojës më të madhe për një sulmues klasi, ende nuk është gati të japë dritën jeshile për transferimin.
Ndërkohë tek Liverpool, Mohamed Salah gjithashtu ka pranuar një rinovim kontrate. Egjiptiani do të jetë dhe për 3 vite të tjera pjesë e “The Reds”. Salah bëhet kështu lojtari më i paguar në ekipin e Jurgen Klopp, ndërkohë që klubi afroi dhe Fabio Carvalho nga Fulham, një tjetër sulmues.
Megjithatë, largimet gjithashtu nuk kanë munguar. Divock Origi iu bashkua Milan në Itali, ndërkohë që Mane zgjodhi gjigandët e Bayern Munich. Takumi Minamino ndërkohë iu bashkua Monaco në Francë. Ndërkohë në lidhje me Antony, braziliani luan më së shumti në krahun e djathtë, pozicioni ky i preferuar dhe i Salah. Ai iu bashkua Ajax në vitin 2020 nga skuadra e Sao Paolo për shifrën e 14 milionë paundëve. Antony ka shënuar deri më tani 22 gola në 78 takime gjithsej me hollandezët.
Dilema e vërtetë është a i duhen Liverpool anësorë të tjerë në repartin ofensiv. Kjo është një pyetje që në fund mund t’i përgjigjet vetëm Jurgen Klopp.