Sipas raportimeve më të fundit të prestigjozes The Sun, 3 nga klubet më elitare në Premier League-ën angleze, janë të interesuara në shërbimet e lojtarit të Olympiacos, Aguibou Camara. Liverpool, Newcastle dhe Leicester janë vetëm 3 prej ekipeve të interesuara në kartonin e futbollistit.
Mesfushori 20 vjeçar shihet si një lojtar mjaft fleksibël, që mund të aktivizohet në pozicione të ndryshme të fushës. Camara ka shënuar 5 gola dhe 2 asiste, në 17 paraqitje në të gjitha kompeticionet me klubin e tij këtë sezon. Futbollisti ndihmoi Olympiacos të fitonte derbin klasik grek përballë rivalëve të AEK Athens, duke shënuar një gol mjaft të bukur.
Mediat në angli bëjnë me dije se agjenti i lojtarit është kontaktuar nga Liverpool, Leicester dhe Newcastle United. Burime pranë Camara thonë se me shumë mundësi lojtari do të fillojë aventurën e tij në Angli, në merkaton e ardhshme verore.
Por presidenti i Olympiacos, Evangelos Marinakis, e di shumë mirë se ka një lojtar mjaft të talentuar në duart e tij. Për këtë arsye, Marinakis pritet të kërkojë të paktën 20 milionë paundë për kartonin e futbollistit. Kjo shifër mund të rritet nëse Camara vazhdon paraqitjet e tij mbresëlënëse në Europë.
Futbollisti nga Guinea cilësohet nga shumë analistë sportivë, si një nga talentet e reja më premtues në Europë. Për këtë arsye, interesi nuk ka munguar as nga klubet në Itali dhe Francë. Monaco dhe Bologna janë 2 nga klubet që po ndjekin nga afër situatën e lojtarit te Olympiacos.
Ndërsa në Spanjë, Valencia dhe Villarreal kanë shfaqur gjithashtu interes për Camara. Trajneri i Villarreal, Unai Emery, thuhet se pëlqen stilin e lojës së lojtarit. Megjithatë, një lëvizje drejt Premier League duket opsioni më i mundshëm për Camara, që sipas miqëve të tij të afërt, gjithashtu preferon kampionatin anglez.