Liverpool është shumë afër zyrtarizimit të një marrëveshjeje, për transferimin e kolumbianit Luis Diaz në Anfield. Anësori i Portos ka konsoliduar pozitat e tij, si një nga lojtarët më të talentuar të vitit të fundit në Europë, dhe Jurgen Klopp është mjaft i impresionuar nga aftësitë e Diaz.
Diaz shkëlqeu në 2 përballjet e Porto me Liverpool në Champions League, dhe kjo gjë nuk kishte si të mos binte në sytë e Klopp, i cili ka aprovuar shifrën prej 60 milionë paundësh për të marrë shërbimet e kolumbianit. Megjithëse tekniku gjerman do të preferonte merkaton e verës për një operacion të tillë, largimi i Sadio Mane dhe Mohamed Salah drejt Afcon, mund t’i vështirësojë gjërat për Liverpool.
Klauzola për prishjen e kontratës së Diaz ka vlerën e 67 milionë paundëve, por Liverpool kërkon të mbyllë marrëveshjen për më pak. Sulmuesi shënoi 11 gola dhe 6 asiste për Porto sezonin e kaluar, përpara se të shkëlqente në Copa America gjatë verës.
Ndërkohë nga ana tjetër, rivalët e Liverpool, Manchester United, i kanë ofruar Paul Pogba një propozim të ri kontrate. Sipas kontratës së re, mesfushori do të përfitojë një shifër të frikshme prej 500,000 paundësh në javë, duke u bërë kështu lojtari më i paguar në historinë e Premier League.
Përfaqësuesit e United kanë frikë se mund të humbasin Pogba me kosto zero në verë, duke qënë se kontrata e francezit skadon në fund të sezonit. Për këtë arsye, sipas propozimit të ri të “Djajëve të Kuq” mesfushori do të përfitojë të paktën 100,000 paundë më shumë sesa mund të fitojë tek ekipe të tjera në Europë.
Sipas SunSport, Pogba ende nuk ka vendosur nëse do të hedhë firmën tek kontrata e re, por kjo ofertë mendohet të jetë e fundita që klubi i bën francezit.