Telenovela mes Romelu Lukaku dhe Inter ende nuk ka marrë fund! Sipas raportimeve më të fundit nga Calciomercato në Itali, sulmuesi belg kërkon rikthimin tek ekipi i tij i vjetër, edhe nëse kjo do të thotë se duhet të ulë pagën.
Nga ajo që shohim sot, zgjedhja e Lukaku për t’iu bashkuar Chelsea në fillim të sezonit duket se ka rezultuar një gabim në të gjitha aspektet. Performanca e tij ka lënë për të dëshiruar, marrëdhënia me fansat ka qënë problematike, si dhe mungesa e bashkëpunimi me shokët e ekipit nuk ka rezultuar i frytshëm në fushën e blertë.
Sanksionet e fundit ndaj Chelsea-it të Roman Abramovich kanë shtuar akoma më shumë pasigurinë mbi të ardhmen e klubit, dhe kjo gjë ka bërë që sulmuesi belg të mendojë seriozisht largimin nga Stamford Bridge. Sipas thashethemeve, Lukaku i ka dërguar një mesazh me tekstin “shihemi së shpejti”, ish-shokëve të tij të skuadrës tek Inter, megjithëse kjo gjë ende nuk është konfirmuar.
Por problemi me një rikthim potencial tek Inter është aspekti financiar i lëvizjes. Chelsea pagoi plot 115 milionë euro për kartonin e belgut te italianët, dhe kjo është një shifër që zikaltërit kurrsesi nuk mund ta paguajnë për të rikthyer Lukakun në Itali. Duke qënë se forma e lojtarit ka qënë me luhatje gjatë këtij sezoni, Chelsea do të kërkojë më pak për shërbimet e tij, por shifra sipas të gjitha gjasave do të jetë përsëri larg mundësive të Inter.
Një alternativë me më shumë mundësi për t’u realizuar është ajo e një transferimi në formë huazimi. Belgu mund t’i bashkohet kampionëve në fuqi të Italisë për dy sezone si i huazuar, me të drejtë blerjeje në fund të kësaj periudhe. Kjo do të ulte ndjeshëm koston përfundimtare për kartonin e tij, por shumë gjëra do të varen përsëri nga forma e futbollistit, në rast se ky skenar realizohet.