Manchester City duket se ka plane të mëdha për sulmin, në merkaton e verës. Ferran Torres është shumë pranë afrimit te Barcelona në janar, por trajneri i anglezëve, Pep Guardiola, ka bërë me dije se “qytetarët” nuk do të nënshkruajnë me një sulmues të ri, merkaton e ardhshme. Sipas të gjitha gjasave, kjo do të thotë se City është duke grumbulluar fondet e nevojshme, për transferimin e një superstari në skuadër, dhe mediat angleze kanë zbuluar emrin e tij.
Bëhet fjalë për bomberin e Dortmund, Erling Haaland, i cili është nën radarin e gati të gjithë klubeve që dominojnë sot Europën.
Këtë verë, Manchester City pritet të shtojë në arkën e vet, plot 46.7 milionë paundë që do të përfitojë nga kartoni i Torres. Trajneri Guardiola ka përsëritur dhe një herë se marrëveshja mes anglezëve dhe Barcelonës është shumë pranë finalizimit.
Në fakt, planifikimi për operacionin “Haaland” ka filluar prej kohësh tek “qytetarët”, dhe City ka gati tre marrëveshje të tjera, për të krijuar financat e duhura, për kartonin e një lojtari si Erling Haaland, që ka një kosto të përafërt prej 75 milionë eurosh.
Së pari, Pedro Porro mund t’i bashkohet Sportingut për rreth 8 milion paundë, pasi marrëveshja e tij dyvjeçare e huazimit, skadon në fund të sezonit. Për lojtarin ndërkohë ka shfaqur interes dhe Real Madrid, megjithëse Sporting mund të përdorë klauzolën në kontratën aktuale, për të blerë përfundimisht kartonin e futbollistit.
Në të njejtën kohë, Schalke në Gjermani ka opsionin për të blerë shërbimet e japonezit Ko Itakura, për 5 milionë paundë, ndërsa Morgan Rogers i cili gjithashtu luan si i huazuar te Bournemouth, mund të bëhet lojtar i përhershëm i “The Cherries” nëse ata paguajnë 9 milionë paundë.
Duke kombinuar këto të ardhura potenciale, me ato që do të vijnë nga shitja e Torres, City do të ketë të gjitha mundësitë financiare për të firmosur me Erling Haaland, nëse dëshira e lojtarit është të luajë për “qytetarët”.
