Manchester City është gjithnjë e më afër transferimit të Marc Cucurella. Kjo pasi Brighton mësohet se po kërkon në mënyrë intensive për zëvëndësuesin e lojtarit, i cili pritet të largohet shumë shpejt nga “Pulëbardhat”.
Brighton është duke targetuar mbrojtësin e majtë të Porto, Zaidu, dhe kjo do të thotë se Cucurella e ka të hapur rrugën për t’u larguar. Gjithsesi, klubi anglez po has në konkurrencën e Crystal Palace, që gjithashtu kërkon të bëjë të vetin Zaidu. Ky i fundit është aktivizuar në 40 takime me Porto, gjatë sezonit që lamë pas. Nigeriani gjithashtu ka luajtur në Champions League dhe është grumbulluar dhe nga kombëtarja e Nigerisë.
Kontrata aktuale e Zaidu me portugezët skadon në vitin 2025, por mësohet se “Dragonjtë” janë të gatshëm të heqin dorë nga shërbimet e tij, për shumën e duhur financiare. Lojtari përfaqësohet nga super-agjenti Jorge Mendes, i cili sigurisht kërkon transferimin e Zaidu. Nëse gjithçka realizohet me sukses, kjo do t’i japë shkas Manchester City që të vijë me një ofertë zyrtare për Cucurella, e cila mendohet të jetë rreth 30 milionë paundë.
“Qytetarët” kanë vërtet nevojë për opsione në krahun e majtë të mbrojtjes, teksa Benjamin Mendy nuk është i disponueshëm ndërsa Joao Cancelo dhe Oleksandr Zinchenko nuk janë përshtatur asnjëherë 100% në këtë rol, dhe kjo është dukur qartësisht gjatë këtij sezoni. Për këtë arsye, Guardiola është në kërkim të një lojtari që i përshtatet më natyrshëm krahut të majtë të mbrojtjes. Cucurella është një alternativë mjaft e mirë. Një tjetër është dhe Nathan Ake, por ky i fundit është një lojtar më universal, që i pëlqen të ndërrojë pozicionet.
Ndërkohë, aftësia e Cucurella për të ndërtuar aksione në sulm është një tjetër faktor që e bën atë lojtarin perfekt për ekipin e Pep Guardiolës.