Manchester City i Pep Guardiolës është shumë pranë finalizimit të transferimit të Jack Grealish nga Aston Villa, për shumën rekord të 100 milionë paundëve. Marrëveshja mund të zyrtarizohet në kohë për ndeshjen që “qytetarët” do të luajnë përballë Leicester City, e vlefshme për Community Shield.
Transferimi i 25 vjeçarit do të vendosë një rekord të ri në merkaton e Premier League. Rekordin për lëvizjen më të kushtueshme në kampionatin anglez e mban momentalisht transferimi i Paul Pogba drejt Manchester United, për shifrën e 89 milionë paundëve në vitin 2016.
Bisedimet për Grealish duket se po ecin në mënyrë shumë më të qartë sesa ato për Harry Kane, objektivin tjetër të Pep Guardiola. Mësohet se anglezi nuk po gjen gjuhën e përbashkët me bosin e Tottenham, Daniel Levy, për largimin e tij nga Spursat. Sipas raportimeve, është dita e dytë që Kane nuk është paraqitur në trajnim me ekipin, duke shprehur pakënaqësinë e tij për mos-arritjen e një marrëveshjeje.
City mbetet shumë optimist për transferimin e Kane, megjithatë, klubi i ka thënë jo në mënyrë kategorike shumës prej 160 milionë paundësh që ishte sugjeruar nga Tottenham në fillim të verës. Trajneri i ri i Spurs, Nuno Espirito Santo, ende nuk ka komentuar mbi situatën, që prej konferencës së tij të parë për shtyp kur iu bashkua klubit. Atëherë, portugezi deklaroi se Kane ishte pjesë e planeve të tij për të ardhmen.
Kontrata e futbollistit skadon në vitin 2024, pasi Kane nënshkroi për 6 vite të tjera në vitin 2018. Anglezi ka shënuar plot 221 gola për Tottenham, dhe renditet si golashënuesi i dytë më i mirë në historinë e klubit, pas Jimmy Greaves, i cili ka shënuar 266 gola.
Fati i Kane ende mbetet në dyshim, por tensionet mes tij dhe Tottenham vetëm sa rriten, dhe në këto rrethana, qëndrimi i tij në Londër duket shumë i vështirë.
