Pas raportimeve dhe lajmeve të shumta në javët e fundit, Manchester City ka zyrtarizuar më në fund afrimin e Erling Haaland në ekip. 21 vjeçari ka firmosur një kontratë 5 vjeçare, deri në vitin 2027 me klubin. Haaland ia doli të shënojë plot 86 gola në 89 takime me Borussia Dortmund, duke u kthyer në një nga sulmuesit më të kërkuar në arenën europiane.
Drejtori sportiv i Manchester City, Txiki Begiristain, deklaroi për transferimin e Haaland:
“Haaland është një talent i madh dhe ka qënë një nga sulmuesit më të mirë në Europë gjatë sezoneve të fundit. Rekordi i tij si golashënues është i jashtëzakonshëm, ndërsa performancat e tij me Dortmund, sidomos në Champions League tregojnë se ai mund të triumfojë dhe në nivelet më të larta. Erling ka gjithçka që ne kërkojmë nga një sulmues dhe jemi të bindur se ai do të shkëlqejë në këtë skuadër dhe në këtë sistem.”
Nënshkrimi me Erling Haaland i jep fund kërkimit të City për një sulmues tipik, që prej largimit të Sergio Aguerro drejt Barcelonës. Përpara se t’i bashkohej City, sulmuesi ishte gjithashtu nën shënjestrën e Real Madrid dhe Barcelonës. Norvegjezi ka shënuar gjithsej 92 gola në kampionat për Molde, Red Bull Salzburg dhe Borussia Dortmund. Vitin e kaluar Haaland vendosi rekordin për lojtarin më të ri që shënon mbi 20 gola në Champions League.
Paralelisht, lojtari ka shënuar 20 gola në 21 paraqitje me kombëtaren norvegjeze. Kjo do të thotë se Haaland i duhen vetëm 14 gola për t’u kurorëzuar si golashënuesi më i mirë i të gjitha kohërave për kombëtaren norvegjeze.
Vet futbollisti u shpreh mjaft krenar për aventurën e tij të re, duke thënë se ka ndjekur Manchester City-n që kur ishte i vogël. Sipas Haaland, moduli i lojës së City-t i përshtatet mjaft mirë atij, pasi ekipi i Pep Guardiolës krijon shumë shance për gol gjatë një takimi.
