Sipas prestigjozes “The Athletic”, Manchester United ka bërë një ofertë zyrtare për shërbimet e Christian Eriksen. Mesfushori danez mund të largohet me kosto zero nga skuadra e Brentford, pasi kontrata e tij 1 vjeçare skadon në 30 qershor.
Lojtari firmosi një kontratë afatshkurtër me ekipin e Thomas Frank, dhe imapkti i tij ishte i menjëhershëm. Brentford fitoi 7 nga 11 ndeshjet në të cilat Eriksen u aktivizua, dhe ky i fundit ndihmoi klubin anglez që të mbyllte Premier League në vendin e 13-të në renditje. Përpara se të firmoste me Brentford, Eriksen filloi të stërvitej pranë klubit të Ajax në Hollandë. Brentford është i interesuar që Eriksen të rinovojë kontratën e tij, por mesfushori bëri me dije se po merr në konsideratë disa opsione për të ardhmen. Ai tha:
“Do të doja shumë të luaja futboll në Champions League. E di se sa ndjesi e bukur është, por nuk është e domosdoshme për mua.”
Manchester United ndërkohë nuk ia doli të shkonte më shumë se vendi i gjashtë në renditje sezonin që lamë pas. Kjo do të thotë se “Djajtë e Kuq” nuk mund t’i përmbushin Eriksen dëshirën për të luajtur në Champions League, të paktën sezonin që po vjen. Megjithatë, United mund t’i ofrojë danezit një rrugë drejt rikthimit në kompeticionin prestigjoz, duke triumfuar në Europa League.
Pavarësisht interesimit për Eriksen, prioriteti kryesor në mesfushë i United mbetet Frenkie de Jong i Barcelonës. Por operacioni për transferimin e tij në Old Trafford mund të rezultojë i komplikuar. Spanjollët janë në vështirësi financiare, por kjo nuk do të thotë se do të heqin dorë lehtë prej një nga aseteve të tyre më të çmuar. Duke marrë parasysh këtë United duhet të ketë disa alternative në tavolinë, dhe Eriksen është padyshim një kandidaturë e fortë.
