Trajneri i Manchester United, Erik ten Hag, është mjaft konfident se klubi do të afrojë lojtarë të tjerë në skuadër, deri në mbylljen e merkatos verore. Transferimi i Casemiro ishte një lëvizje mjaft e rëndësishme për “Djajtë e Kuq”, por Ten Hag nuk ka ndërmend të ndalet me kaq. Sipas burimeve të “Mirror”, drejtuesit e klubit janë ende në bisedime intensive me mesfushorin e Barcelonës, Frenkie de Jong.
Përfaqësuesit e United kanë udhëtuar drejt Spanjës për të ringritur dhe një herë urat e komunikimit me agjentët e De Jong. Ky i fundit i ka bërë “like” një postimi në Instagram që paraqiste ardhjen e Casemiro në Old Trafford. Kjo mund të jetë një indicie se hollandezi mund të ketë ndëruar mendjen për një transferim tek United. Fillimisht u raportua se mesfushori preferonte një lëvizje tek Chelsea.
Paralelisht, një tjetër lojtar që Manchester United po monitoron është sulmuesi i Ajax, Antony. Braziliani ka një marrëdhënie shumë të ngushtë me trajnerin Ten Hag dhe raportime të ndryshme kanë bërë me dije se lojtari preferon një lëvizje drejt Old Trafford. Antony gjithashtu ka postuar në rrjetet sociale imazhe të fitores së United ndaj Liverpool, duke shprehur suportin e tij për “Djajtë e Kuq”. Sulmuesi gjithashtu u la jashtë 11-shes së Ajax në fundjavë.
Pas fitores së papritur ndaj Liverpool, Erik ten Hag diskutoi dhe një herë tjetër objektivat e United në merkato, duke dhënë indicie se klubi është në ndjekje të disa lojtarëve të nivelit elitar. Hollandezi përsëriti:
“E kemi thënë që në fillim, kemi dashur të sjellim lojtarët e duhur, dhe jo lojtarë të rastësishëm. Tani e di se kemi lojtarin e duhur në ekip (Casemiro), jam i bindur për këtë. Por merkatoja nuk është mbyllur. Na duhen numra, por jo vetëm, na duhet dhe kualitet.”