Manchester United mund të heqë dorë përfundimisht nga Jesse Lingard, që në janar. “Djajtë e Kuq” janë të gatshëm të pranojnë 10 milionë paundë për kartonin e sulmuesit, gati gjysma e shifrës që United kishte vlerësuar Lingard në merkaton e fundit.
Pas një periudhe të suksesshme huazimi tek West Ham, këta të fundit kërkuan të blinin përfundimisht kartonin e Lingard. Por United në atë periudhë kërkoi 25 milionë paundë për shërbimet e futbollistit. Gjithsesi, gjërat duket se kanë ndryshuar dhe West Ham mund të arrijë tashmë një akord në qoftë se gjithçka shkon si duhet.
Në fillim të sezonit, ishte vet Lingard që donte të provonte, se ishte një lojtar i rëndësishëm në Old Trafford. Por gjërat nuk shkuan si duhet për 28 vjeçarin. Lingard ka zhvilluar vetëm 8 paraqitje me United gjatë këtij sezoni, duke humbur kështu vendin e titullarit në ekip. Për më shumë, futbollisti është aktivizuar vetëm 1 herë në ndeshjet e Kupës, kompeticion ky që ofron tradicionalisht më shumë hapësira për lojtarët e stolit.
Mësohet se futbollisti kërkon me ngulm të aktivizohet në Kupën e Botës vitin e ardhshëm, dhe për ta bërë këtë gjë, i duhet të vërtetojë se meriton një vend në skuadrën e Gareth Southgate. Për këtë arsye, opsioni më i mirë për futbollistin mbetet West Ham. Lingard jo vetëm që e njeh shumë mirë ekipin, por ka dhe raporte të shkëlqyera me trajnerin David Moyes.
United ndërkohë po shpreson që Newcastle të tregojë interes ndaj sulmuesit, duke qënë se pronarët e rinj të klubit zotërojnë asete të fuqishme financiare. Kjo do të thotë se “Djajtë e Kuq” mund të përfitojnë më shumë të ardhura, në rast se arrijnë një marrëveshje me Newcastle. Por pavarësisht destinacionit, duket se largimi i Lingard është thjesht çështje kohe.