Nëse transferimi i Robert Lewandowski drejt Barcelonës dështon, Manchester United është gati të bëjë një ofertë zyrtare për bomberin polak. Ky është lajmi që ka bërë të ditur “The Sun” në Angli, teksa sulmuesi ka bërë të ditur prej disa javësh tashmë, dëshirën e tij për t’u larguar nga Bayern Munich këtë verë.
Mediat botërore kanë spekulluar më së shumti për një marrëveshje mes Lewandowskit dhe spanjollëve të Barcelonës, teksa sipas raportimeve lojtarit i pëlqen ideja e të luajturit futboll në Camp Nou. Por ky operacion nuk është aspak i lehtë. Barcelona gjendet në një situatë mjaft të vështirë financiare, dhe duhet të sakrifikojë disa prej lojtarëve të klubit, për të mbuluar shpenzimet potenciale të bomberit të Bayern Munich. Kjo pavarësisht se kostoja e vet operacionit nuk mendohet të shkojë më shumë se 20 milionë paundë. Është pikërisht paga e futbollistit ajo që mban koston e vërtetë të transferimit.
Këtu hyn në lojë United, që po monitoron nga afër situatën. “Djajtë e Kuq” mendohet se po përgatisin një lëvizje të ngjashme si ajo që solli Cristiano Ronaldon në Old Trafford sezonin që lamë pas. Lewandowski është 4 vite më i ri se CR7 dhe po kalon momentin më të mirë në karrierën e tij, teksa ia doli të shënojë plot 57 gola në 55 ndeshje sezonin e kaluar.
Avantazhi që United ka në krahasim me Barcelonën është padyshim ai ekonomik. Anglezët nuk “tremben” nga një pagë rreth $400,000 paundë në javë. Megjithatë, disavantazh për United është momenti në të cilin ekipi ndodhet. Trajneri i ri Ten Hag do të marrë në zotërim një klub me shumë probleme të brendshme, që nuk do të luajë në Champions League gjatë sezonit të ri. Kjo do të thotë se Barcelona mund të joshë polakun me një projekt sportiv më të mirë. Gjithsesi, vendimi i takon në fund vetëm Lewandowskit, dhe mbetet të shohim se cila do të jetë zgjedhja e sulmuesit.