Mbrojtësi i Chelsea, Antonio Rudiger, ka refuzuar ofertën e fundit të klubit për rinovim kontrate, e cila sipas raportimeve përllogaritet të jetë në shifrën e 200 mijë paundëve në javë. Rudiger është një nga 3 mbrojtësit e Chelsea të cilëve u skadon kontrata në verë, dhe ende nuk kanë pranuar të hedhin firmën mbi një marrëveshje të re. Cesar Azpilicueta dhe Andreas Christensen janë në të njejtën pozitë.
Por situata e krijuar mes klubit dhe gjermanit, ka kapur vëmendjen e rivalëve të Manchester United. Këta të fundit po konsiderojnë bërjen e një oferte konkrete për shërbimet e lojtarit, sidomos tani që dhe Real Madrid duket se ka ulur interesimin për Antonio.
Trajneri i “Djajëve të Kuq”, Ralf Rangnick, thuhet se është një fans i madh i Rudiger. Megjithëse Rangnick pritet të lërë rolin e trajnerit në fund të sezonit, ai do të qëndrojë pranë United si konsulent dhe për të paktën 2 vite. Kjo do të thotë se gjermani mund t’i shtyjë akoma më shumë drejtuesit e klubit që të bëjnë një lëvizje për Rudiger në verë.
Sipas Daily Mail, Rudiger fiton momentalisht rreth 100 mijë paundë në javë tek Chelsea. Drejtuesit e klubit londinez janë ende të bindur se mund të arrijnë një akord me lojtarin, por lajmi për refuzimin e një oferte sa dyfishi i asaj aktuale, ka bërë që klubet europiane të vihen në lëvizje.
Real Madrid dhe PSG i kanë ofruar Rudiger mundësinë e një para-kontrate. Ajo e francezëve është më tërheqëse përsa i përket termave financiarë, por thuhet se mbrojtësi preferon një lëvizje drejt kryeqytetit spanjoll. Por Florentino Perez nuk ka ndërmend të bëjë një ofertë më të mirë, të paktën tani për tani. Kjo pasi presidenti i galaktikëve i beson fort prestigjit që zotëron ekipi i Los Blancos.
