Paul Pogba do të largohet nga Manchester United me kosto zero në merkaton e verës. Lajmi është konfirmuar nga vet klubi, teksa kontrata e fituesit të Kupës së Botës skadon në fund të qershorit. Pogba i kushtoi klubit anglez plot 89 milionë paundë, kur vendosi të rikthehej në Angli nga skuadra e Juventus. Në një deklaratë zyrtare për lëvizjen, “Djajtë e Kuq” u shprehën:
“Ky ishte fundi i një karriere që solli kaq shumë momente individuale. Kaq shumë gola të bukur, asiste dhe aftësi. Një djalosh që nisi karrierën e tij në akademi në moshën 16 vjeçare ia doli të paraqitej mbi 200 herë me United dhe të fitonte kupën e të rinjëve, si dhe 2 trofe madhor. Kjo është diçka për t’u duartrokitur dhe festuar.”
Vet francezi shprehu mirënjohjen e tij për kohën e kaluar në Manchester, nëpërmjet një postimi në Twitter:
“Ndihem i privilegjuar që kam luajtur për këtë klub. Kam kaluar shumë momente të bukura dhe kujtime por më e rëndësishmja kam marrë suport pa kushte nga fansat. Faleminderit Man Utd.”
Por çfarë rezervon e ardhmja për Paul Pogba? Skenari që po përflitet më shumë është një rikthim i dytë tek Juventus në Itali. Megjithatë, ende nuk ka asnjë lajm zyrtar. PSG dhe Real Madrid janë gjithashtu të interesuar për kartonin e mesfushorit, me spanjollët që mund të bëjnë një lëvizje të kalkuluar mirë, duke qënë se kostoja e vetme do të jetë paga që kërkon Pogba. Lojtari është i prirur t’i ulë kërkesat e tij, duke qënë se asnjë kampionat në botë nuk mund të krahasohet me nivelin financiar të Premier League.
Ndërkohë, një tjetër lojtar që do të largohet nga Manchester United në verë është dhe Jesse Lingard. Ky i fundit mund t’i bashkohet West Ham, ku ka luajtur më parë si i huazuar.
