Ylli i Manchester United, Marcus Rashford, ka qënë në formë fantastike gjatë javëve të fundit tek “Djajtë e Kuq”, dhe duket se kjo ka shtyrë drejtuesit e klubit që të hedhin hapa shtesë, për të siguruar që sulmuesi të qëndrojë në Old Trafford.
United ka përcaktuar çmimin e kartonit të lojtarit, në rast se klubi detyrohet të heqë dorë prej tij në fund të sezonit, gjë që ka pak shanse të ndodhë. “Djajtë e Kuq” do të kërkojnë plot 120 milionë paundë për shërbimet e anglezit, nga çdo ekip që kërkon të bëjë të vetin lojtarin. Rashford ka një kontratë aktive deri në fund të sezonit të ardhshëm me Manchester United, pasi klubi aktivizoi një kaluzolë të paracaktuar në kontratën e tij aktuale, që parashikonte rinovimin me 1 vit ekstra.
Gjithsesi, forma fantastike e sulmuesit, që ka shënuar 22 gola këtë sezon, ka tërhequr vëmendjen e shumë klubeve “big” në Europë. Mes tyre janë PSG dhe Real Madrid. Madrilenët kërkojnë një zëvëndësues afatgjatë për Karim Benzema, që është në vitet e fundit të karrierës, ndërkohë që PSG ka potencialin ekonomik për të përballuar shifrën e vendosur nga United për kartonin e Rashford. Barcelona gjithashtu po monitoron situatën por katalanasit janë më të disavantazhuar, duke marrë parasysh problemet e tyre ekonomike.
Pavarësisht interesimit nga klubet rivale, Rashford mendohet se është i kënaqur me pozitat e tij në Old Trafford. Sulmuesi është kthyer në një lojtar bazë në formacionin e trajnerit Ten Hag, por fakti se Marcus ende nuk ka firmosur një kontratë të re, ka bërë që drejtuesit e “Djajëve të Kuq” të tregohen të kujdesshëm. Sulmuesi mendohet se ka në tavolinë një propozim për një kontratë të re, sipas të cilës do të përfitojë plot 300 mijë paund në javë. Burime të afërta pranë Rashford thonë se ai për momentin është i përqëndruar vetëm tek ndeshjet e rradhës, dhe do të mendojë për të ardhmen e tij në një moment të dytë.