Mbrojtësi veteran i Real Madrid, Marcelo, mund të largohet nga skuadra spanjolle në verë, pas 15 viteve në klubin madrilen. Braziliani ka fituar statusin e legjendës tek galaktikët, por duket se rrugëtimi i tij është drejt fundit. Marcelo ka zhvilluar 533 paraqitje me Real Madrid dhe ka fituar plot 22 trofe madhorë gjatë aventurës me spanjollët. Por cili do të jetë hapi i rradhës në karrierën e mbrojtësit të majtë?
33 vjeçarit i skadon kontrata me klubin në fund të këtij sezoni, dhe rinovimi ka shumë pak mundësi që të ndodhë. Përgjatë 2 sezoneve të fundit braziliani është aktivizuar në vetëm 31 paraqitje në La Liga. Kjo dhe për shkak të shqetësimeve të ndryshme muskulare. Gjithsesi, potenciali dhe eksperienca e tij janë ende të vlefshme në fushën e blertë.
Sipas prestigjozes Mirror në Angli, qëllimi i Marcelo është të rikthehet në Brazil, tek ish-klubi i tij Fluminense. Ishte pikërisht ky, vendi mbrojtësi ra në sy për talentin e tij, dhe në vitin 2007 iu bashkua gjigandëve të Real Madrid. Lojtari zhvilloi 40 paraqitje për Fluminense, që është një nga gjigandët e futbollit brazilian. Që prej ardhjes së tij në Madrid, ai u konsiderua si Roberto Carlosi i ardhshëm, kjo për shkak të stilit të tij të ngjashëm të lojës me ish-mbrojtësin brazilian.
Për shkak të aftësive të tij teknike, atyre në sulm, arritjeve me Real Madrid, dhe paraqitjeve vendimtare në ndeshje të rëndësishme, Marcelo fitoi shpejt reputacionin si një prej mbrojtësave të krahut, më të mirë në botë. Por gjithsesi, Real Madrid është tashmë në kërkim të pasuesit të tij, dhe ky duket një mision i vështirë, duke marrë parasysh se sa i gjithanshëm është braziliani.
Mbrojtësi është linkuar gjithashtu me një lëvizje të mundshme drejt Serie A, por ky nuk është plani i parë në dëshirat e tij.
