Sipas raportimeve më të fundit të Marca, talenti francez i PSG, Kylian Mbappe, ka refuzuar një kontratë të re 6 vjeçare me PSG. 22 vjeçari ka shprehur dhe një herë tjetër dëshirën e tij për t’iu bashkuar Real Madrid, pavarësisht afrimeve të reja të klubit nga Parisi këtë merkato. Francezi ka munguar në festën e ditëlindjes së Ander Herrera, ku shokët e tij ishin të pranishëm, dhe pritet të zhvillojë një takim me presidentin Nasser Al-Khelaifi ditën e hënë.
Ndërkohë nga Spanja, mësohet se Pau Torres ka refuzuar një transferim të mundshëm drejt Tottenham Hotspur. Arsyeja ka qenë fakti se klubi londinez nuk do të luajë në Champions League këtë sezon. Ndërkohë nga ana tjetër, ekipi aktual i Torres, Villarreal, do të provojë fatin e tij në kompeticionin prestigjoz.
Në Angli, Jude Bellingham i Dortmund është nën radarin e Chelsea, që e shikon atë si alternativë ndaj Declan Rice të West Ham. Blutë e Londrës kanë zhvilluar një merkato mjaft të mirë deri më tani, me Romelu Lukakun që mund të konsiderohet goditja e tyre kryesore. Por mesa duket ekipi i drejtuar nga Tuchel nuk ka ndërmend të ndalet këtu. 18 vjeçari Bellingham zhvilloi një sezon impresionues me Borussia Dortmund, pas transferimit të tij nga Birmingham City. Kjo ka qenë mëse e mjaftueshme si arsye për të ngjallur interesin e Chelsea. Megjithatë, këta të fundit duhet të heqin dorë prej disa lojtarëve, për të rregulluar financat e tyre, përpara një investimi tjetër.
Nga ana tjetër, rivalët e Chelsea, Arsenal, po kërkojnë të nënshkruajnë me sulmuesin e Inter Lautaro Martinez. Objektivi i “topçinjëve” duket i vështirë pasi Inter u detyrua të hiqte dorë nga Romelu Lukaku, dhe largimi i një tjetër sulmuesi, do të krijonte shumë boshllëqe në repartin ofensiv të italianëve. Pavarësisht kësaj, peshë të madhe pritet të ketë dhe vet dëshira e argjentinasit, i cili momentalisht nuk ka shprehur asnjë opinion.
