Mesfushori amerikan i Juventus, Weston McKennie, mund të largohet që në janar nga klubi italian. 23 vjeçari ka patur një sezon me ulje-ngritje te Juventus, që prej ardhjes së tij nga gjermanët e Schalke. Kjo është dhe arsyeja se përse “Zonja e Vjetër” dëshiron që të shesë shërbimet e lojtarit, pavarësisht dëshirës së tij për të luftuar për një vend titullari në ekipin e Massimiliano Allegri.
Situata e lojtarit te Juventus ka tërhequr vëmendjen e anglezëve të Leeds, që duket se do të bëjnë një ofertë zyrtare për mesfushorin. Trajneri Marcelo Bielsa po përgatitet për luftën e mbijetesës, teksa ekipi i tij gjendet në vendin e 16 në renditjen e Premier League, vetëm 2 vende larg rënies nga kategoria.
Juventus mendohet se kërkon rreth 20 milionë paundë për shërbimet e lojtarit, shifër kjo që është e përballueshme nga Leeds. Weston zotëron potencialin e duhur fizik, dhe është një mesfushor që mbulon shumë hapësira në fushën e blertë. Kjo është pikërisht ajo që i duhet Leeds, megjithëse për McKennie, ky transferim mund të konsiderohet një hap prapa në karrierën e tij. Megjithatë, lojtari mund ta shikojë këtë transferim të mundshëm, si një mundësi për të provuar veten në një kampionat të ri.
Trajneri Marcelo Bielsa nuk është një fans i afrimeve në janar, por dëmtimet e lojtarëve kyç në skuadrën e tij, duket se nuk i kanë lënë zgjidhje teknikut.
Ndërkohë sipas raportimeve të SunSport, Leeds janë gjithashtu të interesuar në blerjen e kilianit Ben Brereton Diaz nga Blackburn Rovers. Por në të njejtën kohë, anglezët duket se do të humbasin Kalvin Phillips, i cili edhe nëse nuk largohet në janar, me shumë mundësi do të lërë klubin në fund të sezonit. Interesi është i lartë për kartonin e tij nga ana e Liverpool dhe Manchester United.