Sipas raportimeve në Itali, kuqezinjtë e Milan janë në përpjekje për të afruar në ekip mbrojtësin e talentuar të Manchester United, Eric Bailey. Momentalisht 27 vjeçari është i angazhuar me kombëtaren e tij, Bregun e Fildishtë, për African Cup of Nations. Gjithsesi, kjo gjë nuk ka ndaluar thashethemet në lidhje me të ardhmen e lojtarit.
Sipas Sky Italia, drejtuesit e Milan mendojnë se Bailey është lojtari ideal për të përforcuar skaudrën këtë merkato janari. Por, nëse transferimi nuk zyrtarizohet, kuqezinjtë janë përsëri të prirur për të kërkuar kartonin e mbrojtësit në verë. Megjithatë, Milan ka nën radarin e vet dhe alternativa të tjera, në rast se skenari “Bailey” nuk konkretizohet.
Nathan Ake i Manchester City, Pablo Marie i Arsenal dhe Malang Sar i Chelsea janë opsionet e tjera, por qëndër-mbrojtësi i United mbetet numri 1 në listën e italianëve.
Por cila është dëshira e vet lojtarit?
Bailey e di mjaft mirë se hapësirat për të tek United janë të kufizuara. Në momentin që Rafael Varane të kthehet përsëri në 100% e tij pas dëmtimit, 27 vjeçari me shumë mundësi do të jetë në stolin e “Djajëve të Kuq”. Raportimet e mëparshme kanë bërë me dije se Eric dëshiron që të luftojë për vendin e tij tek anglezët, por tani duket se situata ka ndryshuar.
Ndërkohë tek United, së fundmi është përfolur se Anthony Martial është gjithashtu drejt largimit. Francezi e ka shprehur hapur tashmë dëshirën për t’u larguar nga nga Old Trafford, dhe për disa javë u përfol se Barcelona ishte e interesuar në shërbimet e sulmuesit. Por tani duket se katalanasit kanë humbur disi interesin e tyre.
Në letra është ende një shkëmbim i mundshëm mes Dembele dhe Martial, por gjithçka është ende në fazën e thashethemeve, pa asgjë konkrete mes palëve.