Sulmuesi veteran i Bayern Munich dhe kombëtares gjermane, Thomas Muller, ka ngjallur interesin e Newcastle dhe Everton në Premier League. 2 ekipet rivale po luftojnë me njëra-tjetrën për të realizuar një transferim të bujshëm, përpara mbylljes së merkatos së janarit.
Lojtari do të festojë ditëlindjen e tij të 33-të këtë vit, por performancat e tij në fushën e blertë tregojnë se ai ka ende shumë për të ofruar. Muller ka shënuar 6 gola si dhe ka regjistruar 18 asiste deri më tani gjatë këtij sezoni në Bundesliga. Megjithëse lojtari ngelet një nga elementet kyç të skuadrës së drejtuar nga Julian Nagelsmann, ai po i afrohet vitit të fundit të kontratës. Kjo do të thotë se Bayern duhet të mendojë se si të fitojë të ardhura nga kartoni i bomberit, ndërsa Muller mund të provojë diçka të re në karrierën e tij.
Newcastle kërkon të shmangë me cdo kusht rënien nga kategoria, dhe për këtë qëllim, anglezët kanë konfirmuar prej disa javësh afrimet e Kieran Trippier dhe Chris Wood. Trajneri Eddie Howe dëshiron t’i shtojë ekipit eksperiencën e Thomas Muller, që mund të rezultojë deçizive në këtë pikë të sezonit.
Ndërkohë nga ana tjetër, Everton gjendet në një pozicion më të mirë sesa rivalët e tyre. Megjithatë, skuadra gjendet në vendin e 16, përsëri shumë afër zonës së “ftohtë”. Shkarkimi i trajnerit Benitez vetëm sa e ben më delikate pjesën e dytë të sezonit për Everton, që më shumë nga të gjitha i duhet përvoja e një lojtari veteran.
Gjithsesi, ende nuk ka një ofertë zyrtare nga klubet e Premier League për shërbimet e Muller. Trajneri i Bayern, Julian Nagelsmann, deklaroi se është i bindur se gjermani mund të luajë në nivele të larta dhe për 4 vite të tjera, por nuk komentoi mbi mundësinë e një rinovimi. Kjo i ka hapur rrugë dhe lajmeve, për largimin e mundshëm të Muller, nga Bayern Munich.