Oleksandr Zinchenko i Manchester City është në listën e objektivave të Newcastle, për merkaton e janarit. Mbrojtësi i Manchester City e ka humbur vendin e titullarit në ekipin e Pep Guardiolës, teksa trajneri spanjoll i ka dhënë më shumë hapësirë Joao Cancelo. Zinchenko ka luajtur vetëm 56 minuta në Premier League këtë sezon, dhe kuptohet që lojtari kërkon një ekip ku mund të aktivizohet rregullisht.
Këtu hyn në lojë Newcastle. Bordi i klubit kërkon dëshpërimisht të forcojë skuadrën e vet, në mënyrë që të shmangë rënien nga kategoria. Për këtë arsye, një nga objektivat e Newcastle është dhe mbrojtësi ukrainas i City. Ekipi që ndodhet momentalisht në fund të renditjes së Premier League, është i interesuar për një marrëveshje në formë huazimi me City-n.
24 vjeçari ka hezituar për t’u larguar më përpara nga “qytetarët”. Në vitin 2018 ai refuzoi një lëvizje drejt Wolves, për të luftuar për vendin e tij si titullar në Etihad Stadium. Këtë sezon gjërat nuk po shkojnë si duhet për mbrojtësin, por kjo dhe për shkak të një dëmtimi. Gjithsesi, në vitet e kaluara, futbollisti është aktivizuar më shumë gjatë pjesës së dytë të sezonit, dhe Zinchenko po shpreson që ky të jetë rasti dhe këtë vit.
Ukrainasi deklaroi për mediat:
“Kuptohet se jam këtu për të ndihmuar skuadrën me sa kam mundësi. Jam gati të luaj në çdo moment që trajneri më kërkon. Të gjithë po japin maksimumin në fushën e lojës. Reagimi në ndeshjen ndaj PSG ishte i jashtëzakonshëm.”
Manchester City është momentalisht duke kërkuar për lojtarë në repartin difensiv. Kjo dhe për shkak të situatës me Benjamin Mendy. Mbrojtësi do të përballet në gjyq me akuzat e rënda për përdhunim, dhe për këtë arsye, e ardhmja e tij në skuadrën e Pep Guardiolës mbetet e paqartë.
