Paris Saint-Germain ka hapur kontaktet me Zinedine Zidane, në rast se trajneri aktual i francezëve, Mauricio Pochettino, vendos të lërë klubin. Ish-trajneri i Real Madrid është kandidati numër 1 që drejtuesit e PSG kanë përzgjedhur, në rast se Manchester United i mbush mendjen Pochettinos që të pranojë një kontratë në Angli.
Zidane është i disponueshëm, duke qënë se momentalisht, francezi nuk ka një kontratë aktive me asnjë klub. Verën e kaluar ai i dha fund aventurës së dytë me Real Madrid. Në krye të madrilenëve ish-futbollisti ndihmoi skuadrën të ngrinte 3 herë trofeun e Champions League, dhe 2 herë atë të La Liga. Sipas raportimeve, tekniku ka shprehur interes për stolin e PSG.
Klubi parizien është i mendimit se filozofia e Zidane si trajner është pikërisht ajo që i duhet klubit. Francezi është pragmatist, dhe ka eksperiencë të konsiderueshme në menaxhimin e një ekipi të plotësuar me yje në të gjitha repartet. Kjo do të thotë se Zidane me shumë gjasa do të jetë njeriu i duhur për të gjetur balancën, në një ekip me lojtarë si Lionel Messi, Neymar dhe Kylian Mbappe.
Gjithsesi, e paqartë mbetet situata në lidhje me Mauricio Pochettino. Argjentinasi ende nuk i ka komunikuar presidentit të PSG apo drejtorit sportive, dëshirën për t’u larguar në të ardhmen. Kjo me shumë mundësi për shkak se as nga Manchester United nuk ka një ofertë konkrete, dhe sipas të gjitha gjasave, nuk do të ketë deri në verë.
Skenari më i mundshëm është afrimi i Pochettinos, si trajneri i ri i PSG sezonin e ardhshëm, dhe në të njejtën kohë, zyrtarizimi i Zidane në krye të stolit të PSG. Ky i fundit e njeh mirë futbollin francez, dhe si një fitues i Kupës së Botës në vitin 1998, Zidane mund të rezultojë copëza e fundit që i ka munguar parizienëve, gjatë gjithë kësaj kohe.