Sipas raportimeve më të fundit të AS në Spanjë, presidenti i Real Madrid, Florentino Pérez, është i bindur se Kylian Mbappé do të jetë pjesë e madrilenëve sezonin e ardhshëm. Sulmuesi francez ka rreth 6 muaj kontratë të mbetur me parizienët e PSG, dhe deri tani nuk ka asnjë shenjë për një rinovim të mundshëm, me klubin e tij aktual. Ndërkaq në Bernabéu atmosfera është mjaft pozitive, dhe duket se e gjithë strategjia që bordi drejtues pritet të ndjekë sezonin e ardhshëm, përfshin dhe emrin e Mbappé.
Një burim pranë PSG u shpreh për AS, duke sqaruar se përse Mbappe ka insistuar prej kohësh tashmë, që të veshë fanellën e galaktikëve:
“Tek Real Madrid ai (Mbappe) nuk do të ndihet si një lojtar suportoues, siç ndihet tani tek PSG me praninë e Lionel Messi dhe Neymar në klub. Në Madrid, sipas të gjitha gjasave Mbappe do të jetë qëndra e një projekti ambizioz, qëllimi i të cilit është të triumfojë në skenën botërore.”
Për më tepër, dihet se ndër ambiciet kryesore të Kylian Mbappe është dhe trofeu i “Topit të Artë”. Sulmuesi i PSG përfundoi i nënti në listë në renditjen e këtij viti, një rezultat ky zhgënjyes. Sidomos duke marrë parasysh se kur ishte vetëm 18 vjeç, Mbappe u rendit i katërti në listën e vitit 2018, pasi kishte fituar Kupën e Botës me Francën.
Lojtari i PSG e di mirë se gati të gjithë fituesit e “Topit të Artë” përgjatë historisë kanë qënë pjesë e Real Madrid, një prej tyre është dhe Cristiano Ronaldo, që është idhull i sulmuesit francez.
Ndërkohë nga ana tjetër, trajneri i galaktikëve, Carlo Ancelotti, nuk është shprehur publikisht mbi lajmet që qarkullojnë në lidhje me Kylian Mbappe. Gjithsesi, italiani e di se një treshe sulmi e përbërë nga Mbappé, Benzema dheVinícius, është e destinuar të jetë fituese.