Lajmi se drejtuesit e Arsenal janë në bisedime me talentin e Manchester City, Gabriel Jesus, është bërë tashmë prej kohësh publik. Por duket se “topçinjtë” nuk kanë ndërmend të ndalen me kaq. Së fundmi, londinezët kanë kontaktuar dhe sulmuesin e Napoli, Victor Osimhen, mbi një transferim të mundshëm në Emirates sezonin e ardhshëm.
Mikel Arteta po mundohet të lërë pas dëshpërimin e mos-kualifikimit në Champions League, duke ndërtuar një ekip mjaft premtues për sezonin e ardhshëm. Duke marrë parasysh se Alexandre Lacazette dhe Eddie Nketiah pritet të largohen në verë, tekniku spanjoll duhet të sigurohet për të mos lënë boshllëqe në repartin ofensiv të Arsenal.
Sipas prestigjozes GOAL, agjenti i Osimhen ka fluturuar drejt Londrës në fundjavë, për t’u takuar me drejtorin sportive të Arsenal, Edu. Megjithatë, anglezët janë të ndërgjegjshëm për vështirësitë e këtij operacioni. Presidenti i Napoli, Aurelio De Laurentiis, njihet si një negociator tejet i vështirë, dhe klubi italian me shumë mundësi do të kërkojë më shumë se 68 milionë paundë për shërbimet e lojtarit. Kjo ishte shuma që napoletanët i paguan Lille për të përfituar kartonin e Osimhen në vitin 2020.
Fakti që Napoli është kualifikuar në Champions League sezonin e ardhshëm e bën akoma më të vështirë që vet sulmuesi të bindet për t’iu bashkuar Arsenal, duke qënë se “topçinjtë” do të luajnë në Europa League.
Ndërkohë përsa i përket Gabriel Jesus, bisedimet duken në një faze të avancuar dhe sulmuesi është gjithnjë e më afërt transferimit tek Arsenal. 25 vjeçari ka dhe një vit të mbetur në kontratën e tij me Manchester City, por ka kuptuar tashmë se e ka humbur rolin e titullarit në ekip. Me ardhjen e Erling Haaland në ekip pozitat nuk do të përmirësohen për Jesus, i cili është i prirur të pranojë një lëvizje drejt Arsenal.