Presidenti i Atletico Madrid, Enrique Cerezo, ka hedhur poshtë lajmet e javës së fundit se ylli i Manchester United, Cristiano Ronaldo, mund t’i bashkohet ekipit spanjoll. Portugezi ka bërë të qartë dëshirën e tij për t’u larguar nga “Djajtë e Kuq”, teksa kërkon të luajë për një ekip në Champions League.
Por ndryshe nga ajo që është raportuar deri më tani, Atletico Madrid nuk do të jetë një prej tyre. Këtë gjë e garantoi presidenti i madrilenëve, Enrique Cerezo, i cili për radion El Partidazo de COPE deklaroi:
“Nuk e di se kush e ka shpikur historinë për Cristiano Ronaldon dhe Atletico Madrid. Padyshim që nuk është e vërtetë. Praktikisht, është e pamundur për të (Ronaldo) që të luajë për Atletico Madrid.”
Ndër ekipet e tjera që ishin linkuar me yllin portugez ishte dhe Chelsea. Megjithatë, ekipi i Thomas Tuchel ndali interesimin para pak kohësh. Bayern Munich gjithashtu u përmend si një nga destinacionet e mundshme të Ronaldo, sidomos pas largimit të Lewandowski nga bavarezët. Megjithatë, drejtuesit sportivë gjermanë e kanë parë si të papërshtatshëm profilin e CR7 për modulin e lojës të Bayern.
Deri më tani nuk ka pasur asnjë ofertë konkrete për shërbimet e Cristiano Ronaldo, nga klubet europiane. Mediat në Angli raportuan se sulmuesi refuzoi një ofertë të majme prej 210 milionë paundësh nga Arabia Saudite, pasi nuk është i interesuar për këtë destinacion, në këtë moment të karrierës së tij.
Portugezi është rikthyer në ambjentet stërvitore të United, pas mungesës së gjatë për shkak të pushimeve dhe disa arsyeve të tjera personale. Mësohet se CR7 i ka përsëritur të njejtën kërkesë drejtuesëve të klubit, të cilët po mundohen të gjejnë alternativa për të mos humbur një nga lojtarët e tyre më të çmuar.