Paris Saint-Germain është gati të shesë Neymar këtë merkato vere, nëse oferta e duhur financiare “troket” në derën e parizienëve. Por sipas raportimeve, sulmuesi brazilian nuk dëshiron të largohet nga Parc des Princes.
Neymar zbarkoi në Paris në vitin 2018 nga Barcelona, për një shifër rekord për kohën. Pavarësisht kësaj, superstari ka kaluar një periudhë të vështirë në Francë. PSG ende nuk ia ka dalë të fitojë Champions League, ndërkohë që rinovimi i bujshëm i Kylian Mbappe do të thotë se hapësirat për Neymar si lider të ekipit do të jenë tejet të kufizuara. Dëmtimet e shpesha të brazilianit, së bashku me veprimet shpesh herë kontradiktore në dhomën e zhveshjes, gjithashtu nuk kanë ndikuar për mirë në aventurën e tij në Paris.
Neymar ka një kontratë aktive deri në vitin 2025 me kampionët e Francës, dhe dëshiron të provojë dhe një herë vlerën e talentit të tij në fushën e blertë. Një nga arsyet është dhe Kupa e Botës që do të zhvillohet në dhjetor. Braziliani kërkon të jetë sa më në formë për kompeticionin, teksa përfaqësuesja e tij kuotohet si një nga ekipet favorite për t’u shpallur kampione e botës.
Por cili mund të jetë destinacioni i ardhshëm i Neymar nëse lojtari largohet nga PSG? Alternativat janë relativisht të limituara, për shkak të pretendimeve të larta të sulmuesit mbi pagën e tij. Një nga ekipet e interesuar është Newcastle në Premier League. Pronarët e rinj të klubit kanë të gjithë financat e nevojshme për të suportuar kartonin dhe pagat e Neymar. Gjithsesi ky i fundit nuk është i interesuar t’i bashkohet Newcastle. Rikthimi te Barcelona mendohet të jetë opsioni i preferuar i brazilianit, por gjendja ekonomike e blaugranave e bën të pamundur realizimin e këtij operacioni, të paktën në këtë merkato.