Lajmi i largimit të Leo Messit nga Barcelona padyshim që shokoi të gjithë botën e futbollit. Kjo jo vetëm për shkak të karrierës së gjatë dhe historisë së jashtëzakonshme të lotjarit me katalanasit, por dhe për shkak të mënyrës së papritur sesi lajmi u bë i ditur.
Gjithsesi, franzezët e PSG duket se nuk kanë ndërmend të humbasin asnjë minutë kohë, dhe janë hedhur menjëherë në aksion për të shfrytëzuar situatën. Sipas raportimeve, babai i Leo, Jorge Messi, ka kontaktuar parizienët për t’i hapur rrugë bisedimeve për trasnferimin e superstarit në Paris. Sigurisht, francezët nuk janë të vetmit që dëshirojnë shërbimet e Messit. Chelsea dhe Manchester City i Pep Guardiolës gjithashtu kanë shfaqur menjëherë interesin e tyre.
Përgjigja e klubit francez mësohet se ka qenë pozitive, megjithatë, transferimi i Messi në Parc des Princes nuk do të jetë aspak i lehtë. Kjo pasi Nasser Al Khelaifi dëshiron që gjithashtu të mos humbasë Kylian Mbappe.
Sipas spanjolles MARCA ky është një mision mjaft i vështirë për francezët. Mësohet se klubi është përballë një deficiti prej 200 milionë eurosh, dhe e vetmja mënyrë për të rregulluar ekuilibrat financiarë është shitja e lojtarëve. I vetmi futbollist që ka lënë skuadrën deri më tani është Mitchel Bakker, i cili iu bashkua Bayer Leverkusen. Megjithatë, PSG përfitoi vetëm 7 milionë euro nga transferimi i tij, një shumë kjo e papërfillshme për problemin në fjalë.
E vetmja mënyrë që PSG t’ia arrijë qëllimit është nëse grumbullon po aq të ardhura nga imazhi i Mbappe, sa janë dhe kostot që lojtari i kushton klubit. Gjithsesi, sipas një llogarie të Marca, klubi francez duhet të zotërojë 100% të të drejtave të imazhit të Kylian Mbappe, në mënyrë që të mos ketë humbje financiare. Duke qenë se djaloshi francez ka kontrata me sponsorë të ndryshëm, duket se PSG është e detyruar të zgjedhë mes Mbappe dhe Messi, në këtë merkato verore spektakolare.