Paris Saint-Germain ka nxjerrë zyrtarisht Neymar në shitje, dhe do të pranojë oferta për brazilianin në merkaton e verës. Sipas burimeve të ESPN, rinovimi surprizë i Kylian Mbappe me kampionët e Francës ka bërë që klubi të hedhë sytë drejt një strategjie të re për të ardhmen, dhe Neymar mund të mos bëjë pjesë në këto plane.
Superstari brazilian firmosi një kontratë të re me klubin vitin e kaluar, dhe ka ende 3 vite të tjera aktive sipas marrëveshjes. Por forma fizike në rënie, dëmtimet e vazhdueshme dhe shpesh herë natyra problematike e lojtarit ka bërë që drejtuesit e klubit parizien të konsiderojnë shitjen e kartonit të tij.
Mbappe ndërkohë ka firmosur deri në vitin 2025 me klubin, dhe PSG po hyn në një epokë të re. Drejtori sportiv Leonardo pritet të zëvëndësohet nga Luis Campo, një aleat në thonjëza i Mbappe, duke qënë se lojtari ka bashkëpunuar me Campo në kohën që të dy ishin pjesë e Monaco. Luis gëzon reputacionin si një nga personat më të aftë në zbulimin e talenteve të reja, dhe sigurimin e lojtarëve të rinj premtues.
Ndërkohë në lidhje me Neymar, vet sulmuesi ka thënë se ka dëshirë të qëndrojë në Paris. Klubi ndërkohë dëshiron të gjenerojë fonde për të përmirësuar ekipin. Paga e Neymar i kushton francezëve 35 milionë euro në vit, një shifër mjaft e lartë e cila tremb dhe ekipet e interesuara për lojtarin.
Gazetari sportiv Julien Laurens ka bërë me dije se janë të pakëta klubet që janë në gjendje të investojnë tek Neymar në këtë moment, por Chelsea është një prej tyre. Blutë e Londrës janë të interesuar në një sulmues klasi, që të rivalizojë Liverpool, City, apo dhe United, të cilët e kanë tashmë një të tillë në ekipin e tyre. Megjithatë, problemet fizike të Neymar mund të rezultojnë një pengesë e madhe për operacionin.