Real Madrid po vazhdon me përpjekjet, për të afruar në ekip Kylian Mbappé, kontrata e të cilit me PSG, përfundon qershorin e ardhshëm. Thënë këtë, sulmuesi parizian tashmë e ka bërë të qartë se synimi i tij është të luajë për galaktikët. Përballë raportimeve të shumta që lidhin sulmuesin me klubin spanjoll është dorëzuar dhe drejtori sportivi i PSG, Leonardo, i cili më në fund ka pranuar se Mbappe mund të largohet në verë.
Por, përveç kësaj, interesimi i 13 herë fituesëve të Champions League, për Erling Haaland, është konfirmuar nga Hans-Joachim Watzke, CEO i Borussia Dortmund. Duket se presidenti i spanjollëve, Florentino Perez, ka ndërmend një plan “të cmendur” ku do të bëjë bashkë Haaland dhe Mbappe, në krye të sulmit të galaktikëve.
Hans-Joachim Watzke ishte i ftuar në emisionin e BILD TV, “The situation of the league”, ku dhe deklaroi:
“Pavarësisht se ku shkoj, të gjithë flasin për Erling Haaland. Ajo që di me siguri është se Real Madrid është shumë i interesuar për të. Unë mund të përmend 25 ekipe të tjera tani, por Real ka kontaktuar me klubin. Haaland mund të largohet, por dhe mund të jetë edhe të qëndrojë. Disa ditë më parë pata një bisedë shumë të mirë me Mino Raiolan (agjenti i Haaland). Bisedat me të janë gjithmonë mjaft miqësore. Sigurisht që në javët e ardhshme do të kemi një takim tjetër. Fokusi është në zhvillimin e përgjithshëm të Haaland. Ashtu si me Lewandowski, unë do të doja të isha krenar për Erling, në një moment, nëse ai fiton Champions League-ën. Personalisht, mendoj se është më mirë për të nëse qëndron pak më gjatë në Bundesligë.”
Nëse talenti i Haaland dhe Mbappe, kombinohet me eksperiencën e një veterani si Karim Benzema, duket se madrilenët do të krijonin një treshe sulmi të jashtëzakonshme, e destinuar për të sjellë sukses. Por mbetet të shohim sesa do të jetë në gjendje Real, që të afrojë të dy superstarët në Santiago Bernabeu.