Real Madrid është gati të hyjë në garë me Manchester United, për shërbimet e trajnerit të PSG, Mauricio Pochettino. Ky i fundit mendohet se do të largohet nga drejtimi i pankinës së skuadrës franceze në fund të sezonit. Sipas Sportsmail, e ardhmja e Carlo Ancelottit në krye të stolit të galaktikëve është në dyshim, sidomos pas paraqitjes tejet të dobët në Champions League përballë PSG.
Drejtuesit madrilenë janë prej kohësh adhurues të Pochettino, teksa kërkuan shërbimet e tij dhe verën e kaluar, por PSG nuk ishte e gatshme të hiqte dorë nga argjentanisai. Megjithatë, rrethanat e tanishme mund të bëjnë që klubi parizien të heqë dorë nga tekniku në fund të sezonit. Florentino Perez do të vihet menjëherë në ndjekje të Pochettino, në rast se Ancelotti largohet, dhe kjo gjë ndikon drejtpërdrejt në planet e Manchester United për një trajner të ri.
Pochettino dhe Erik ten Hag i Ajax janë prej kohësh dy kandidatët kryesorë që përfliten për të marrë drejtimin e “Djajëve të Kuq”. United tashmë do ta ketë më të vështirë të arrijë objektivin e vet, dhe në mënyrë indirekte, këtu do të ketë ndikim dhe Kylian Mbappe.
Nëse sulmuesi vendos përfundimisht që t’i bashkohet madrilenëve, kjo mund të jetë një arsye shtesë për Mauricio Pochettino që të pranojë të ulet në pankinën e galaktikëve. Kjo pasi trajneri argjentinas dhe Mbappe kanë krijuar një marrëdhënie shumë të afërt me njëri-tjetrin në Paris. Transferimi i një lojtari me kaq shumë potencial në Santiago Bernabeu është dhe garanci për Pochettinon, i cili e ka më të lehtë të krijojë një ekip fitues. Real Madrid gjithashtu zotëron një prestigj relativisht më të madh në arenën europiane, sidomos për argjentinasin i cili e ka provuar një herë një aventurë në Angli dhe është i prirur të provojë diçka të re.
