Sipas raportimeve më të fundit, galaktikët e Real Madrid janë duke monitoruar nga afër mbrojtësin e Chelsea, Antonio Rudiger. Kontrata e këtij të fundit skadon në verë, dhe madrilenët dëshirojnë afrimin e tij me kosto zero në Spanjë.
Duke qenë se kontrata e mbrojtësit me Chelsea skadon në verë, lojtari ka mundësinë të lidhë një para-kontratë me një klub tjetër, që në muajin janar. Presidenti i Real, Florentino Pérez, po mendon t’i ofrojë një pagë të majme Rudiger, në mënyrë që ta bindë atë të zgjedhë madrilenët. Sipas Daily Mail, mbrojtësi mund të përfitojë deri në 200,000 paundë në javë, në qoftë bëhet pjesë e galaktikëve.
Por ku do t’i gjejë Real financat e nevojshme? Verën e ardhshme priten ndryshime të thella në ekipin e drejtuar nga Carlo Ancelotti. Gareth Bale, Isco dhe Marcelo sipas të gjitha gjasave, do të lënë klubin, duke liruar Real nga shpenzimet për pagat e tyre. Ish-lojtari i Chelsea, Eden Hazard, gjithashtu është një nga kandidaturat për t’u larguar. 30 vjeçari ka kaluar një periudhë të vështirë në Spanjë, duke dështuar të japë më të mirën e tij tek “Los Blancos”. Si pasojë, Hazard nuk po gjen hapësirat e duhura në ekip.
Ndërkohë në lidhje me Antonio Rudiger, trajneri i Chelsea, Thomas Tuchel, deklaroi në shtator se dëshiron që klubi të bëjë maksimumin që lojtari të mos largohet nga Stamford Bridge. Sipas Tuchel, Rudiger është një lojtar i rëndësishëm dhe forma e tij konsistente në fushën e blertë është një nga aspektet më të mira të lojtarit.
Por Real Madrid, gjithashtu i nevojiten shumë shërbimet e mbrojtësit të Chelsea. Largimet e Ramos dhe Varane kanë lënë një hapësirë bosh në repartin difensiv të madrilenëve, të cilët nuk mund të mbështeten vetëm tek David Alaba dhe Eder Militao.
