Drejtuesit e Real Madrid po planifikojnë një ofertë konkrete për shërbimet e bomberit të Manchester City, Erling Haaland. Spanjollët kërkojnë të sjellin në Bernabeu një sërë talentesh të reja, duke përfshirë këtu dhe Jude Bellingham, në përpjekje për të formuar një gjeneratë të re superstarësh.
Klubi spanjoll është në kërkim të një zëvëndësuesi të denjë për Karim Benzema, që është në fund të karrierës. Megjithëse Kylian Mbappe ka qënë gjithmonë në krye të listës së dëshirave të presidentit Perez, duket se gjërat kanë ndryshuar së fundmi, dhe galaktikët do të zhvendosin fokusin e tyre tek Haaland.
Trajneri Carlo Ancelotti gjithashtu pritet të largohet në verë, pavarësisht bilancit të skuadrës në fund të sezonit, duke i hapur kështu rrugën një tranzicioni të rëndësishëm në ekip. Ndërkohë përsa i përket Haaland, Manchester City pritet t’ia vështirësojë punët spanjollëve, por në Madrid ekziston një bindje se drejtuesit mund të shfrytëzojnë situatën e ngatërruar që City po kalon, në lidhje me akuzat për shkelje të rregullave financiare.
Në rast se “qytetarët” dënohen për këto shkelje, Haaland rrezikon të luajë futboll në Champions League, dhe kjo mund ta afrojë gjithnjë e më shumë sulmuesin drejt Santiago Bernabeut. Fillimisht mendohej se presidenti i Real, Florentino Perez, do të priste merkaton e vitit të ardhshëm për t’u hedhur në sulm për Haaland, por në Madrid ekziston besimi se lëvizja mund të realizohet që këtë vit.
Haaland ka shënuar plot 27 gola në 25 ndeshje deri më tani me “qytetarët”. Paraqitja në plan individual ka qënë padyshim e jashtëzakonshme, por megjithatë, ka ende shumë zëra që nuk janë të bindur nëse norvegjezi e ka bërë Manchester City-n një ekip më të mirë këtë sezon. Lojtari ishte shumë pranë transferimit në Spanjë verën e kaluar, por përfundimisht zgjodhi Anglinë si destinacionin e tij të rradhës.
