Sipas burimeve të FootballTransfers, Cristiano Ronaldo do të largohet në fund të sezonit nga Manchester United, nëse “Djajtë e Kuq” nuk ia dalin të kualifikohen në Champions League. Portugezi po mendon për një lëvizje të mundshme drejt PSG në Francë, opsion ky që nuk dukej i realizueshëm para pak javëve.
CR7 mungoi në humbjen e thellë që United pësoi në derbin me City në shifrat 4-1. Arsyeja zyrtare e mungesës së lojtarit ishte një dëmtim i lehtë. Duke qënë se nuk aktivizohet dot për skuadrën e tij, sulmuesi është nisur drejt Portugalisë për të gjykuar më qartë mbi të ardhmen.
United do ta ketë mjaft të vështirë që të sigurojë një vend në katërshen e parë të renditjes në Premier League këtë sezon, dhe kjo ka bërë që Ronaldo të shqyrtojë opsionet që ka në tavolinë. Burime pranë futbollistit bëjnë me dije se një rikthim tek Juventus është përjashtuar si mundësi. Gjithashtu, një rikthim tek Sporting Lisbon, vendi ku Ronaldo nisi karrierën ka pak gjasa të ndodhë në këtë moment.
Opsion ende i vlefshëm është një lëvizje sensacionale drejt Paris Saint-Germain, ku Ronaldo do të luante përkrah Messi dhe Neymar në sulm. Megjithatë, nga klubi francez nuk ka ende një shprehje interesi zyrtar për Ronaldo.
Ky i fundit ka shënuar deri më tani 15 gola në të gjitha kompeticionet këtë sezon. Por shumica e këtyre realizimeve erdhën në pjesën e parë të sezonit. Që prej ardhjes së trajnerit Ralf Rangnick në krye të pankinës së United, Ronaldo ka vuajtur një rënie në formë duke mos arritur të përshtatet dot me modulin e teknikut gjerman.
Anglezët do të kenë një trajner të ri në fillim të sezonit të ardhshëm, por kjo mund të mos mjaftojë për të bindur Ronaldon që të rinovojë me United.
