Sipas raportimeve të fundit të BBC Sport, Chelsea ka pranuar shumën e kërkuar nga Manchester City për kartonin e Raheem Sterling. Blutë e Londrës pritet t’i paguajnë “qytetarëve” 50 milionë paundë për shërbimet e sulmuesit anglez. Ky i fundit do të firmosë një kontratë 5 vjeçare me Chelsea, me opsionin për të rinovuar dhe 1 vit ekstra. Lojtari do t’i nënshtrohet ekzaminimeve mjekësore përpara se marrëveshja të zyrtarizohet në media.
Sterling kishte dhe 1 vit të mbetur në kontratën e tij me City dhe drejtuesit e klubit vendosën të përfitojnë të ardhurat nga kartoni i tij, duke shmangur largimin me kosto zero vitin e ardhshëm. Sulmuesi iu bashkua ekipit të Pep Guardiolës në vitin 2015 nga Liverpool. Që prej atij momenti Sterling ka shkëlqyer duke shënuar 131 gola në 339 paraqitje me “qytetarët”.
Ky do të jetë afrimi i parë madhor për Chelsea, që prej marrjes së pronësisë së klubit nga bilioneri amerikan Todd Boehly. Mediat angleze bëjnë me dije se gjithçka do të zyrtarizohet shumë shpejt, për t’i lënë kohë Sterling që t’i bashkohet klubit të tij të ri në turin para-sezonal në Amerikë.
Një aventurë e re tek Chelsea duket opsioni më i mirë për Sterling, i cili është i ndërgjegjshëm për vështirësitë e të luajturit si titullar tek Manchester City. Sezonin e kaluar, sulmuesi shënoi 13 gola në 30 paraqitje në Premier League, por pavarësisht kësaj, mundësitë e tij u zvogëluan shumë nga afrimi i Jack Grealish në ekip. Në 2 gjysmëfinalet e Champions League përballë Real Madrid, Sterling gjithashtu u la në stol nga trajneri Guardiola. Situata tek City nuk dukej drejt përmirësimit për anglezin, teksa këtë vit “qytetarët” afruan 2 sulmues të rinj në ekip, Julian Alvarez dhe Erling Haaland, me këtë të fundit që nuk e diskuton vendin e titullarit.
