Philippe Coutinho mund të rikthehet në Premier League, teksa raportimet e fundit kanë bërë me dije se trajneri i Aston Villa, Steven Gerrard, ka komunikuar personalisht me mesfushorin në telefon.
Aston Villa ka qënë mjaft mbresëlënëse, që prej ardhjes në krye të pankinës së legjendës së Liverpool. Por megjithatë, skuadrës ende i mungon kreativiteti në sulm, dhe kjo gjë është vënë re më shumë përballë ekipeve të forta në Premier League. Skuadra ka në dispozicion fondet e duhura, pasi në verë arriti të grumbullojë plot 100 milionë paundë për shërbimet e Jack Grealish, i cili u transferua tek Manchester City. Duke u nisur nga kjo, Gerrard po bën përpjekjet e tij për të sjellë në ekip një lojtar të kalibrit të lartë si Coutinho.
Braziliani la Liverpool në vitin 2018, për t’u transferuar tek Barcelona për shifrën e jashtëzakonshme prej 140 milionë paundësh, por aventura e mesfushorit në Spanjë nuk shkoi si duhet. Katalanasit po kalojnë një nga momentet më të vështira në historinë e tyre, dhe Coutinho nuk ka mundur të ketë impaktin e duhur në fushë.
Sipas gazetarëve spanjollë, Gerrard kërkon një lëvizje në formë huazimi. Gazetari Gerard Romero ka thënë se ky skenar i intereson të gjitha palëve, pasi braziliani mund të provojë dhe një herë se ende ka potencial dhe talentin e duhur, ndërsa Barcelona nuk humbet një nga lojtarët e saj më të çmuar.
Nëse Coutinho largohet, spanjollët gjithashtu do të kenë mundësinë që të përshpejtojnë procedurat e regjistrimit të Ferran Torres, i cili erdhi nga Manchester City, për shifrën e 55 milionë paundëve.
Një tjetër arsye se përse Gerrard kërkon Coutinho, është raporti mjaft i afërt që këta të dy kanë me njëri-tjetrin. Braziliani dhe trajneri i Villa kanë luajtur përkrah njëri-tjetrit në 81 takime tek Liverpool, dhe Gerrard ka thënë në atë kohë se mesfushori ka qënë një nga shokët e skuadrës të preferuar.