Thomas Tuchel mund të rikthehet përsëri në rolin e trajnerit, dhe mesa duket tekniku gjerman nuk ka ndërmend të largohet nga Premier League. Sipas mediave angleze, Tuchel është i interesuar për postin e trajnerit të Tottenham. Ish-trajneri i Chelsea po mendon seriozisht mbi këtë aventurë të re dhe është i gatshëm të hedhë hapin e rradhës, në rast se tekniku aktual i Tottenham, italiani Conte, largohet nga detyra.
Antonio Conte nuk ka diskutuar asnjëherë mbi rinovimin e kontratës me londinezët, pavarësisht faktit se ajo skadon në fund të sezonit. Kontrata e tij përfshin dhe një kusht ku klubi mund të rinovojë për 1 vit shtesë me teknikun. Gjithsesi, kjo do të varet sipas të gjitha gjasave nga ecuria e Tottenham, që objektiv kryesor ka kualifikimin në Champions League sezonin e ardhshëm.
Kjo nuk do të jetë e lehtë, teksa spursat gjenden në vendin e pestë në renditjen e përgjithshme dhe gara në Premier League sa vjen e bëhet më e ashpër. Për më shumë, Conte ka pasur disa herë fërkime me drejtuesit e klubit përsa i përket politikave të ndjekura në lidhje me merkaton.
Tuchel ndërkohë është momentalisht i lirë, teksa u shkarkua nga Chelsea shtatorin e kaluar. Largimi i gjermanit ishte disi i papritur, dhe u shoqërua me caktimin e Graham Potter në krye të stolit të bluve. Tuchel mendohet se ishte fillimisht i interesuar për postin e trajnerit tek kombëtarja angleze. Megjithatë, pas rinovimit të Gareth Southgate gjermani ka ndryshuar fokusin e tij.
Megjithëse Premier League mbetet opsioni kryesor për të ardhmen e Tuchel, La Liga spanjolle mund të jetë një tjetër alternativë. 49 vjeçari është duke mësuar spanjisht sipas mediave angleze, por ende nuk dihet se cili është klubi që mund të jetë i interesuar në shërbimet e tij.